Balei ngim dei ban pdiang ïa ka Meghalaya State Investment Promotion and Facilitation Act, 2024?

Nyngkong nyngshap ngi hap ban tip kaei kane ka aiñ MISPF bad kumno kane ka aiñ ka long ïakjakor ïa ka snap bad ka hok u paid Khasi ha la ka jong ka Ri bad ka khyndew ka shyiap. Lada ngi pule bin pa bin ïa kane ka aiñ MISPF ngin shem ba ka lamphrang jong ka, lem bad phra tylli ki kyndon kin long ka jingtim pap, ka jingiuhroit bad ka jingkhein dewthala ïa ka hok longbriew manbriew, ka riti ka dustur bad ka riti bat khyndew u Khasi ba la suit la shor naduh ki por u mynbarim bad kiba long ki jingïada ba kyrpang ïa ki paid Khasi lem bad ki pateng ki ban wan. Ki kyndon jong kane ka aiñ ki pynkup bor pura ïa ka sorkar kat haduh ba ka lah ban ïaid lait na kiwei pat ki aiñ ka jylla bad ban ai laitlan ïa ka ba kan leh katba ka sngewbit ne sngewmon.
Ka Khasi Students’ Union (KSU) ka shem ba ka aiñ MSIPF ka dei ka aiñ ïakjakor bad ka aiñ thombor ka ban pynmyntoi bad pynkupbor tang ïa ki katto katne ngut ki briew kiba don ha ka bor bad kiba don ka bor pisa khlem khein snep ïa ka sur u paidbah ka jylla, ban ailad ïa ki paibah ban ai jingmut bad ruh ban ïa syllok ïa u paid nongshong ka jylla. Ka KSU ka shaïong ngaiñ ban ïohi ba ïa kum kane ka aiñ kaba pynap liewlep ïa ki trai shnong ka jylla la pynlong aiñ ha ka iing dorbar thawaiñ (Meghalaya Legislative Assembly) khlem da ïa tyrko janai bad ïatai bin pa bin. Ka rai jong ka Cabinet ka sorkar jylla ban pynkylla kyrteng noh ïa ka Investment Meghalaya Agency (IMA) sha ka Meghalaya Investment Promotion Authority (MIPA) ha ka 15 tarik u Kyllalyngkot 2025 ka dei tang ka jingtap eit miaw namar ki kyndon ïakjakor jong katei ka aiñ ki dang neh sah kumjuh.
Wat ka jingweng noh ïa ka kyndon ba 34 (Section 34) na ka katei ka aiñ bad ka jingai bor ïa ki Autonomous District Councils ha katei ka aiñ kim pat long paka ban pynthikna ba ki jaka ki puta u Khasi kin ym shah knieh, shah dakhol bad shah lilam ha ki kynhun ne sha ki riewshimet ki bym dei ki trai Ri trai Muluk ka jylla khlem da don kino kino ki kyndon kiba kren shai ba kane ka aiñ kan ai jingmyntoi pura ïa ki Khasi.
Na ka por sha ka por ka KSU ka ïai pynsngew sha ka sorkar ban don noh ka rukom (policy) bhah thungkam thungjam wat ha ki kynhun (companies) shi met kiba wan ban seng kam ha jylla jong ngi khnang ban plie lynti ïa ki samla wad kam wad jam jong ka Jaidbynriew ka jong ngi namar ka seng ka sngewthuh ba ka sorkar kan ym lah ban ai kam ïa baroh ki samla wad kam ha ki tnad bapher bapher jong ka. Hooid lada pule ïa ka Meghalaya Industrial and Investment Policy 2024, la buh ïa katei ka bhah mang kam kum kawei na ki kyndon, hynrei kane ka policy kan ym lah ban pynurlong thikna kumba la thoh namar ki kyndon jong ka MSIPF Act ki long sniew haduh katta katta kaba yn wanrah pynban ïa ka jingrung kyrthep ki nongwei, ka jingbam sap bad kiwei kiwei ki kam be-aiñ.
Parari, ka KSU lyngba kane ka kot lyngkop ka pynshai sha phi baroh halor kita ki kyndon kiba ktah naduh ïa ka synshar ka khadar ha jylla, ka rukom shakri hok katkum ki aiñ, ka jinglong trai ha la ka ri ka muluk, ka ïohkam ïohjam bad ka bamsap bampong. Kine harum ki long kita ki kyndon:
1. Ha kaba nyngkong eh, ngi peit shwa ïa ki ktien lamphrang (preamble) jong kane ka aiñ kiba la ai bor lypa ïa ka sorkar ban ailad da kaba suk ïa ki kompeni nabar ban seng karkhana ha jylla da kaba pynsynjor ïa ki kyndon ba ïadei bad ki hok ki nongtrei, ki aiñ ïada mariang ki ban wanrah pat ïa ka jingjulor ka mariang lem bad ki marpoh marhalor ka khyndew, ka jinglah ban leh shiliang ha ka ban jied ïa ki kynhun (company) ban seng karkhana ka ban plie lad pat ïa ki kynhun snaïap ban treikam sha ka jylla bad ruh ban plie lad ïa ki jingpynïaid paidbah ïa ka pisa be-aiñ, ban ïaid lait na ka Income Tax bad kiwei kiwei ki kam be-aiñ.
2. Ka kyndon (section) ba 39 ka kren shai ba yn ym lah ban ujor sha ki bor ka aiñ wat ha iingkashari ruh ïa ki dkhot jong ka Governing Council, ka High Powered Committee, State Investment Committee, District Investment Committee, Nodal Agency lada ki leh kano kano ka jingbakla haba ki sngewdei ba ki leh ïa kaba biang. Ka KSU ka sngew ba baroh ki long kumjuh ha khmat ka aiñ khlem da thew la udei u riew madan ne wat u myntri rangbah ka jylla. Ka jingkhanglad kane ka kyndon ban ujor pyrshah ïa kitei ki dkhot kan pynshlur ïa ki bor sorkar ka jylla ban leh katba ki sngewmon khlem don jingtieng ïa ki bor aiñ ka ban ïalam sha ka jingpyndonkam bakla ïa ka iktiar, ka bamsap bad kiwei ki kam be-aiñ khlem da suidñiew ïa ki aiñ katkum ka riti synshar paidbah. Ka KSU ka dawa ba ïa kum kane ka kyndon dei ban pynduh pyndam mardor namar kan pynïap ïa ka hok synshar khuid katkum ki riti synshar paidbah (democratic principles).
3. Ka kyndon ba 36 jong ka MSIPF pat kam kren shai hynrei ka ong pat ba ka sorkar na ka por sha ka por ka lah ban pynmih kino kino ki jingbthah ba salonsar ne ba kyrpang ban pynurlong ïa ki jingthmu jong katei ka aiñ. Ka KSU ka sngew ba kane ka kyndon ka ïalam bakla namar lyngba kane ka kyndon ka ai bor pura ïa ka sorkar ban pynbor lane pynïaid ïa kino kino ki briew ne kynhun katkum ka jingkwah ki katto katne khlem da khein ïa ka jingktah ïa u paidbah. Kane ka kyndon ka ailad ruh ban ïaid lait na kiwei pat ki kyndon jong kane ka aiñ bad kiwei ki aiñ ba la don lypa ha ka jylla. Ka seng ka sngew ba ka sorkar ka dei ban pynshai kiei kita ki jingbthah ba kyrpang bad salonsar bad lada kam lah ban leh kumta dei ban weng noh ïa katei ka kyndon.
4. Ka kyndon ba 33 pat ka pynjynsur kat haduh ban pynlait ïa ki riew shimet lane ki kynhun (company) na kino kino ki jingpynshitom katkum ki aiñ ka jylla lada ki lehbakla ne pynkhein aiñ, lada, ki lah ban pynshisha ba ym don sabut pyrshah ïa ki ne ïa ki dkhot ka kompeni jong ki ba ki don kti ha kita ki kam be-aiñ. Ka KSU ka sngew ba kum kane ka kyndon kan pynshlur ïa ki briew kiba nabar ban leh donbor ban leh torti katba ki sngewmon lyngba ki buit sianti ki jong ki ban buhrieh ïa ki jingdon kti hakhmat ka sorkar. Kumba long salonsar ïa baroh ki paidbah, ka rai ban pynshitom ïa ki nongleh bymman kan shong beit katkum ki aiñ ka sorkar bad ka iingkashari ym ka rai jong ka MSIPF. Ka MSIPF ka khlem pynshai ruh ïa ki rukom pynsaja ïa kine ki riewshimet ne kynhun ba leh bakla kum ka daiñ kuna lane ka jingset phatok lane baroh ar.
5. Ka kyndon ba 32 ruh kam long shai ha kaba ïa dei bad ki jingïateh kular (undertaking) hapdeng ka sorkar bad ki kynhun riew shimet. Kam pynshai thikna ha kano ka rukom yn ïateh kular bad ha kino ki kyndon aiñ yn pynshtiom ïa kito kiba pynkhein ïa ki jingïateh kular. Kane ka kyndon ruh ka paw shai ba ka sorkar ka lah ban ai ne weng jingmynjur ïano ïano ruh katba ka sngewbit. Ka KSU ka sngew ba ka sorkar ka dei ban pynpaw paidbah ïa ki mat jong ka jingïateh kular bad kumjuh ruh kumno yn pynshtiom ïa kita ki ba pynkhein ïa ka jingïateh kular.
6. Ka kyndon ba 31 ka ong ba ka sorkar, lyngba ka jingmynjur ka Governing Council ka lah ban pynlait kyrpang ïa kino kino ki kynhun riewshimet kiba thmu ban seng karkhana ha ka jylla na kino kino ki kyndon jong kane ka aiñ MSIPF. Kane ka kyndon ruh ka pyni shai ïa ka jingleh donbor ha kaba ka sorkar ka la ban ai jingmynjur ïa ki nongseng karkhana da kaba ïaid lait hi na kane ka aiñ MSIPF. Ka KSU ka dawa ba dei ban pynjah ïa kane ka kyndon kaba wanrah ïa ka jingleh donbor.
7. Ha ka kyndon ba 26, la pynpaw ba ka sorkar lyngba ki shnat ba thung ka MSIPF ka lah ban ïaid lait na kino kino ki kyndon jong ki tnad sorkar ha ka ban ai jingbit ïa ki kynhun seng karkhana. Kane ka dei ka kyndon kaba kdew ïa ka jinglong ïakjakor kane ka aiñ namar lyngba kane ka kyndon ka sorkar ka lah ban ïaid lait na ki kyndon jong ka tnad pynneh mariang ne kino kino ki aiñ jong kiwei ki tnad sorkar. Ka khlem pynshai ruh haduh katno ka por kan ai ïa ki tnad sorkar ba dei ban don bynta ban bishar ïa kita ki kynhun seng karkhana. Tang na kane ka kyndon la paw shai ba ka long kaba suk ïa ki briew ba nabar ban seng karkhana ha jylla jong ngi khlem da donkam ban bud ryntih ïa ki aiñ bad kyndon jong ki tnad sorkar bapher bapher. Kane ka kyndon dei ban weng shisyndon namar kan wanrah ïa ka jingma ïa ka khyndew ka shyiap, ka mei mariang, ka jingshong shngaiñ bad kiwei kiwei.
8. Ka kyndon 5(3) ka pyntip ba ka MIPA kan thung ïa kita ki consultants, ki shemphang barikor bad kiwei kiwei ki briew ban ai jingmut ïa ka ha kaba yn pyntrei kam janai ïa ki kyndon jong kane ka aiñ MSIPF. Ngi la ïohi baroh ba ka secretariat bad kiwei ki tnad sorkar la shlei da kita ki consultants bad consultancy agencies ha kaba kiba bun kim wanrah jingmyntoi eiei hynrei ki shu ïoh tang ban kjit bad pynsyrwa kai ïa ka pisa u paidbah. Ha kum kane ka mat ka sorkar ka dei ban da kren shai bad batai bniah ha khmat u paidbah kum kino kita ki consultants ne kita ki riewshemphang donkam ha ryngkat bad ka kyrdan (qualification & experience).
9. Ha ka kyndon ba 2(xiii) la kdew ba “Local Authority” ka thew ïa District Industries Centre, Urban or Rural Local Body, Industrial Parks, Municipal Boards, Meghalaya Urban Development Authority lane kino kino ki shlem sorkar ba la pynkup bor katkum ki aiñ. Ka KSU ka pynshai hangne ba kano kano ka kam hapoh Ri Khasi kan hap hapoh ka Paragraph 20 jong ka Sixth Schedule bad kumta kino kino ki bor synshar ba la ithuh ha ka Paragraph ba 3 jong ka Sixth Schedule ki dei ban shah kdew lang ha kane ka kyndon. La sngew ba ïa kane ka kyndon dei ban kham pynjanai shuh da ka bsut lang ïa ki Autonomous District Councils bad ki bor synshar tynrai u Khasi kum ki Hima, ki Elaka, ki Raid bad ki Dorbar Shnong.
Parari, katkum kitei ki mat ba la pynshai haneng, ngi sngewthuh shai ba ka aiñ MSIPF kan ym wanrah jingmyntoi eiei ruh em ïa ki trai ri trai muluk. Lada ngi peit ha ka lad ïohkam ïohjam ym shym don kino kino ki kyndon ki ban bthah ba dei ban mang bad ailad shwa ïa ki trai ri trai muluk ban ïoh kam ha kita ki karkhana ki ban wan seng kam ha jylla jong ngi. Khlem ki kyndon ban pynthikna ïa ka mang kam kyrpang ïa ki Khasi, kitei ki karkhana lada ki wan seng kam shane kin ym ai wat tang shipawa ruh na ki kam ba lait sha ki trai ri trai muluk khamtam ha ki kam kiba kham halor. Ka MSIPF kam don kino kino ki kyndon ki ban ïada ïa ka hok jong ki trai ri trai muluk ha kaba ym shym don kino kino ki kyndon kiba pynkup bor lang ïa u paidbah ban ai jingmynjur ha shwa ban wanrah ïa kano kano ka kynhun seng karkhana. Kane ka long pyrshah ïa ka jingthmu jong ka Free, Prior and Informed Consent (FPIC) ba la pyntreikam ha kylleng satlak ka pyrthei bad la ithuh ruh da ka United Nations Declaration on the Rights of Indigenous People.
Shuh shuh ka sorkar jylla na ka por sha ka por ka ju shim ne thied jaka lyngba ka aiñ Land Acquisition Act 2013 kaba tip ruh kum ka Right to Fair Compensation and Transparency in Land Acquisition, Rehabilitation and Settlement Act 2013 bad kiwei kiwei ki aiñ jong ki Autonomous District Councils, te halor kano ka nongrim pat ba ka thaw biang sa kawei ka aiñ ban shim ne thied. Nalor kata, kumba la mih ha ki thup khubor ba ka sorkar ka thmu ban thaw kita ki “Land Banks” ban ai wai sha ki kynhun ba thmu seng karkhana katkum kata ka jingpynkylla ïa ka aiñ MSIPF kaba haduh mynta ka bym pat pynpaw paidbah, ngi hap ban sngewthuh ba kane ka sienjam jong ka sorkar ruh kan wanrah ïa ka jingkyrduh ki jaka ki puta ki ban long trai hi da ki Khasi.
Kyntang ïa wai ka KSU lyngba kane ka kot lyngkdop ka ïawer ïa baroh ki paidbah Khasi ba kum ki trai ri trai muluk ngin hap long kiba husiar ha shwa ban pdiang ïa kino kino ki aiñ ba thaw da ka sorkar namar kumba la paw ha kitei ki kyndon ka MSIPF ba la kdew haneng, kane ka aiñ kan wanrah ïa ka jingtim ïa ka Jaidbynriew ba rit paid ka jong ngi. Ngin hap ban pyrshah horkit hordang ïa kitei ki kyndon ba long ïakjakor bad kumjuh ruh ïa ka aiñ baroh kawei namar kam kren shai eiei ruh em halor ka jingneh jingsah ka long trai u Khasi ha ka khyndew ka shyiap, ka ïohkam ïohjam ki samla Khasi ba wad kam, ka jingwan rung kyrthep bad buhai shnong ki nongwei ha ki lum baieid ki jong ngi, ka jingktah ïa ka rukom synshar khadar u Khasi ba la suit la shor da u longshwa manshwa bad ruh ïa ka jingleh be-ijot ïa ka meiramew ka jong ki.
“Ngin ym long ki nongtong um ne nongthoh dieng jongno jongno ruh”
“Mait Shaphrang Khlur Ka Ri”