Nongstoiñ, Nailar 16: Ka jingrakhe ïa ka sngi laitluid jong ka ri India ha ka 15 tarik jong une u bnai, ka la long pynban ka sngi kaba jynjar tam ïa ki nongleit nongwan na ka surok National Highway 44 (E) na Nongstoiñ sha Shillong, namar ka jingbun jong ki pung kiba ki trai ki pynlong jingïakop khwai dohkha ryngkat ka jingpynkhalai nusib ki don harud ka surok bah.
U babu Witting Mawsor MLA barim ka Mawshynrut u la ong ba ha katei ka sngi, u la mih na Nongstoiñ naduh ka por shibaje nohphai sngi ban leit shim dawai na Shillong. Hynrei naduh Pamphyrnai haduh Langtor la don ka jingpynïakop khwai dohkha ha man la ki jaka, kat haduh ba ka jingsahkut ki kali kiba kit ïa ki nongleit nongwan ka neh da ki bun bun kynta.
U la ong ruh ba ha katei ka sngi ka jingthmu jong u ka long ban leit shim dawai na Shillong bad ban wan phai noh ynda la ïoh dawai namar ki bun ki kam. Hynrei tang na ka daw jong ka jingdheng kali ha man la ki jaka ba pynlong ïakop khwai, ka la shim por haduh phra kynta tam bad ha ka jaka ba un ïoh dawai ha katei ka juh ka sngi, u la hap ban sah miet noh ha Shillong bad shim dawai pat ha ka sngi kaba bud.
Ha kaba ïadei bad katei ka jingdheng kali kaba mih tang na ka daw jong ka jingpynlong ïa ki jingïakop khwai ha ki pung kiba don harud surok, u bah Mawsor u la ong ba balei ka sorkar ka ai jingbit pathar khlem da peit bniah bad khlem da phaidien ïa ki jingjia kiba la jia ha u snem ba la dep, ha kaba wat ki kali kit nongpang ki la sah kut haduh ba ka la don ka jingkhlad noh ki mynsiem kordor hapoh kali tang namar ka jingsahkut da ki bun kynta ha surok namar ka jingïakop khwai dohkha ha ka pung kaba don harud surok.
Utei u Nongmihkhmat barim ka Mawshynrut u la ong ruh ba na ka bynta ka jingïakop khwai dohkha um don jingpyrshah, lada ki nongpynïakop khwai ha ki pung kiba don harud surok ki lah ban pynbiang ïa ki jaka ïeng kali kham pajih na ka surok bah ban ym pynthut ïa ki kali kiba leit ba wan.
Nalor kata u la ong ruh ba ki bor pynïaid district ki dei ban da bishar bniah ïa ki sngi ba ha kajuh ka sngi kim dei ban ai jingbit bun tylli ki pung kiba don harud surok ba kin pynlong ka jingïakop khwai. U la ong ruh ba lada ka sorkar bad ki bor pynïad district kin shu ai jingbit ha kajuh ka sngi kat ïa kiba wan pan jingbit ban pynlong ïa ki jingïakop khwai dohkha, khamtam ha ki pung kiba don harud surok, kan poi ka por ba ka jingïaklumar kan mih hadpeng ki nongleit nongwan bad ki nongshimbynta ha ki jingïakop khwai bad lada mih ki jingklumar ka sorkar bad ki bor pynïaid district ki hap ban shim ïa ka jingkitkhlieh.
U la bynrap ruh da kaba ong ba katei ka jingïakop khwai kaba don bad ki jingpynkhlai nusip, bunsien ki pynmih ïa ki jinghuri hura namar uwei pa uwei u ba la leit ban ïashimbynta ha ka jingïakop khwai u kwah ban ïoh ïa ka buskit bad lada dei kito ki briew kiba la kwah palat ban ïoh hynrei kim ïoh ki lah ban thaw bun ki lad ban pynklumar khnag ba kiwei ruh kin duh.
Nalor kata u la ong shuh shuh ba ka jingpynkhlai nusip da kaba shim da ki slip lei lei namar ba kitei ki slip ki kham tad ka dor wat ki bym leit khwai ruh ki leit tang ban thied ïa ki slip da kaba kyrmen skhem ba kin ïoh ïa ki buskit ba ki la khmih lynti.
