Balei jur ka jingkyrduh bording ha Ri Bhoi haba ka bording ka mih bun na katei ka District?

Ka bording ilektrik ha kane ka juk stad mynta ka long shisha kawei na ki atiar kaba pynsuk ïa ki paidbah ha baroh ki jait kam ne ki jingdonkam jong u paidbah. Teng teng lada ym don ka bording la ïohi ruh ba ki paidbah ki lamwir bad kim nang ban leh ei ei ruh ïa ki kam ki jam. Ha Meghalaya lah ban ongba ka tyllong pynmih bording kaba bun ka dei na ki wah ba hap ha Ri Bhoi District hynrei ki Nongsynshar Shnong ki dang hap ban dawa na ka sorkar ban pynbiang ïa ka bording namar ka jinglip ding ba khah khah ha katei ka district..
Bun na ki kam ki jam kiba ju pyndonkam da ka jingïarap ka bording Ilektrik ki sahkut bad shah teng lada ki paidbah kim ïoh ïa ka bording kaba thikna. Kum ban kdew hangne, yn nai ïa kren ïa kiwei kiwei ki jaid kam ba ki paidbah ki hap ban da pyndonkam da ka bording ilektrik,hynrei kawei na ka jingdonkam kaba u paidbah u lynga ka dei ka jingpyndonkam ïa ki Mobile kaba long kawei na ka lad kaba ïarap ïa ki paidbah ban pyndep ïa ki kam ki jam.
Teng lada ym don ka bording ba thikna ki paidbah kim ïoh wat tang ban pynim ïa ki Mobile (charge) kaba ki ju pyndonkam ha baroh ki liang jong ki kam ki jam. Yn nai ïa kren ruh ïa kiwei kiwei ki kam shisien ba ki paidbah kim ïoh ïaka bording ba thikna la thikna ruh ba baroh ki kam ki jam kin sahkut bad sahteng, namar ha kane ka juk mobile bun ki kam la lah ban pyndep ruh tang da ka jingdon ki Mobile bad ki Network.
Ka jingkylli hangne ka mih, Hato, ki paidbah ka Ri-Bhoi ki ju ïoh mo ïa ka bording kaba thikna namar ïa ka tyllong ba ki tan ia ka bording ka dei ka ba don ha u pud u sam jong ka Ri-Bhoi. Haba jubab ïakane ka kyntien kiba bun hi ki paidbah kin jubab ba kim ïoh thikna ïa ka bording bad kane ka la paw pyrthei ruh wat ha ka sor Nongpoh kaba dei ka Head quarter jong ka District bun na ki paidbah kim ïoh ïaka bording kaba thikna bad nai ïa kren lei lei sha ki shnong Nongkyndong ka Ri-Bhoi.
La lap ruh ïaka jingshisha ha kaba bun ki paidbah lada kim ïoh ïaka bording kaba thikna ka la pynlamwir ïa ki, namar ki kam ki jam kiba hap ban pyndonkam da ka bording Ilektrik ki la shakut lut. Ka nuksa kum ki skul, ki hospital, ki duakn dawai, ki dukan ba buh ïa ki kor Komputer, ki dukan welding, ki Karkhana, ki dukan shna jingbam bad kiwei kiwei ki dukan ki duhnong lada kim ïoh ïa ka bording kaba thikna.
Haba la ju rung ruh sha ki shnong nongkyndong, ka jingud na ki padbah ka ju mih beit ba ka bording kam ju biang thikna katba ïaka bill pat ki hap ban siew thik thik. Bun na ki shnong ha nongkyndong kawei na ka jingeh kaba khraw tam ki ïa kynduh ka dei ka jingbym biang ka bording ilektrik.
Don ruh ki shnong kiba hap ban shong haka jingdum daki taiew bad ki bnai namar ka jingbym poi thikna ka bording bad don ruh ki shnong kiba la sniew u Transformer lei lei jan da ki snem ruh kim ïoh thikna ïa ka bording.
Nai ïa kren ïa kiwei kiwe ki shnong ha ka jylla kiba ym ïoh thikna iaka bording bad ka jingshisha ka paw ruh kum ka Ri-Bhoi District kaba dei ka District ba ka jylla ka tan ïaka bording naka wah Umiam, hynrei kiba bun ki shnong kim ju ïoh thikna ïa ka bording ilektrik.
Kaba kham pynthamula shuh shuh ïaki paidbah, ka long ba tang shu hap u lapbah bad tied u pyrthad la thikna beit ba ki paidbah kin nym ïoh ïa ka bording ilektrik bad ki hap ban shong ha ka jingdum. Haba duh ka bording ne sniew lada leit kylli na ki heh ka tnad MeECL ka jubab kan mih beit ba thud ka line bad ba duna ki nongtrei (lack of Man power).
Kaba pynlyngngoh pat halor kane ka jingbym biang thikna ka bording ka dei ka jingsngap jar u paidbah ki ju ud tang lada ym don bording bad ym don pat kiba nud ban kren ne shim khia ban wad ïa ki lad ki lynti kumno ba ka tnad MeECL ka hap ban pynbiang thikna ïaka bording. Ka la long ruh thik kum kito ki khyllung kiba ïam haba ki thngan ban ïoh buiñ na ka kmie bad kim nang pat ban pan na ka kmie haba ki kwah ne thngan buiñ jong ka kmie.
Nai ïa kren ruh ïa ki paidbah kiba ju ud lada ym biang ka bording ilektrik, hynrei wat ki nongmihkhmat bala jied da u paidbah ban peit ïaka eh ka shong ruh ki shu kbum ïa ka ktien khlem nu dang, namar ïa lade la biang ki Generator ne ki kor pynbiang ïa ka bording haba ka bording ilektrik ka jah ne sniew.
Namarkata, ka la dei ka por baki nongmihkhmat ki hap ban pyrkhat ïa kane ka jingeh ki paidbah ha kaba ki hap ban shim ïaka lad ka lynti kumno ban ïa kren sha ka tnad MeECL kaba la shim ïaka lyngkor ban pynbiang ïa ka bording, katba ha ka jignshisha pat kam lah satia ban pynbiang ïaka bording kumba la angnud u paidbah bad haba kut bnai pat ka bai bording la hap ban siew thik thik da u paidbah uba pyndonkamïia ka bording ilektrik khlem da ïoh pat ia ka jingshai jong ka bording ilektrik…..