Balei hiar dor ka Akor ka Burom : Hato ki kmie ki kpa ki dang ïa pynlut por bad ki khun ha la rympei ïing

K a Akor u Khasi ka dei ka Akor kaba bha tam ha pyrthei hynrei mynta la ïohi katba dang ïaid ki por bad ki snem ka akor ka la nang hiar dor hiar dor ym don shuh ban nang ban ri ïa ka akor ka burom la ka dei ha ki ïing ki sem, ki lynti ki synkieng ne ha ki ïew ki hat ruh. Kane ka la buh jingma shisha ba ka bor jong ka jingsniew ka la trei borbah ha kine ki sngi. Haba ngi phai sha ki Khubor ne ki Telivision bunsien ngim ju ïohsngew shuh ïa kita ki sur kiba ai mynsiem ne kaba kren shaphang ka shongsuk shongsaiñ ne shaphang ka bha ka miat ha ka imlang ka sahlang, hynrei la ïohsngew sa tang ki kam leh donbor, ki kam thombor bad ki kam sniew kiba harukom. Hynrei ka jingkylli ka mih hangne, Hato, man la uwei-u-wei ba la kot ïa ki bor sngewthuh ne ki bor pyrkhat, ngi la ju puson mo ba balei ki mih kine ki kam sniew kiba ha rukom ha ka imlang ka sahlang kaba la pyntad dor ïa ka hok longbriew manbriew bad haduh ka akor ka burom kaba la hiar dor arsut kaba la ïohi ba i kumba aiñ Blei ne ka aiñ Briew kam don shuh.
Na ka por sha ka por, ki mih ki kam tuh ki kam thiem, ki kam pyniap, ki kam lute, ki kam leh beijot ne leh donbor ïa ki kynthei ki khynnah ha kaba kam don shuh kata ka jingshngaiñ ha ka imlang ka sahlang khamtam ïa ki kynthei ki khynnah. Khyndiat pat lah ban ong hangne ba man la uwei-pa uwei u la dei ban puson ïa lade shimet halor ka jingkynrei kine ki kam sniew kiba la ktah shisha ïa ka shongsuk shongsaiñ ha ka imlang ka sahlang jong ka jylla. Ym lah ruh ban len bunsien haba ïohi ïa ki kam sniew la ka long ha ki Kot Khubor ne ki kor Telivision la ïoh sngew tang kata ka jingkren ïa kynshi hapdeng ki para briew bad ka jingkhnium kaba mih na ka shyntur kaba ki da sngewpangnud ba kynrei ki kam sniew. Ka jingkylli ka mih pat hangne.
Hato, katno ngut kiba ju puson ne pyrkhat na ei ka tynrai jong ka jingsniew ka wan bad balei ba ka jur ki kam sniew ha kine ki sngi? Sngew Sangsot ba ki briew ha kine ki sngi la ka long naduh ki khynnah, ki samla bad haduh ki tymmen ki San tang namar ka spah pyrthei bad ba ki ïa beh ia kata ka ‘Rongphong Pyrthei” bad kim don por shuh ban puson ne ban pyrkhat halor ki tynrai ba ka jingsniew ka sdang ban mih. Hynrei ki la shu ïa beh ïa kata ka spah pyrthei bad ki klet noh ban puson ne ban bishar ia ka tynrai ba ka jingsniew ka mih kaba la ktah shisha ïa ka shongsuk shongsaiñ ha ka imlang ka sahlang ha ka jylla bad ka ri.
Kum ban shu ong, ka Jylla jongngi ka dei ka jylla kaba bun tam ki Khristan bad nai ïa kren ïa kata ka bynta, namar la ka long ka niam Khristan ne kino kino ki niam ba kynthup naduh ki Hindu, ki Muslim, ki Sikh bad kiwei kiwei ki jait niam ruh. Ka tynrai jong ka jingngeit bad ka jinghikai ka niam ka long hi shi bynta ban im hok im sot bad ban long kita ki ki jingthaw kiba don ia ki iktiar ban wan rah ia ka shongsuk shongsaiñ ha ki ïing ki sem ne ha ka imlang ka sahlang, phewse!!!!! da khongpong ha kine ki sngi ka jingsniew ka la shong kulai ha man la uwei-pauwei u Briew kiba la klet noh ïa la ka jong ka tynrai kiba la pyrshang ban beh ïa ka Rongphong bad ki jingkwah brai kaba la pyntroiñ shisha ia ka hok Longbriew Manbriew.
Nai da ïa tai sani shaphang ki tynrai ba ka jingsniew ka mih, hynrei to ngin ïa phai dien khyndiat ban puson kumba ong kine ka Kyntien, “Ka kam Leh isnei ne ka kam babha ka sdang na la Rympei” khnang ba ngin sngewthuh ba balei ba kynrei ki kam sniew kam smeh ha kine ki sngi. Kum ban ban ktien, ha kine ki sngi kano kano ka longïing longsem kim don por shuh ban hikai ia la ki khun ki kti ha la rympei “ Sawdong ka Lyngwiar Dpei” namar ba ki la ia beh ïa ki rongphong jong kane ka pyrthei bad kim don por shuh ruh ban shim ïa la ka jingkitkhlieh ïa ki khun ki kti ha kaba ki la ai mon khlem da tehlakam ha la ïing la sem. Bad ym donkam hi ruh ban ïa puson halor ki daw ba ki jingsniew ki la kynrei ha kine ki sngi, Ngi lah ban kren shai sha ka pyrthei, dei tang namar ba ki kmie ki kpa ne ki Longkni Longkpa ha kine ki sngi kim don por shuh ban sneng ne kyntu ïa la ki khun ki Pyrsa ha la ïing la sem bad ki khun ki kti ki la im laitlan katba ki mon ha kaba ki la sdang ban leh na I kam sniew I barit bad kan sa pur pat haduh ba ki jingsniew ki la kiew skong ha kine ki sngi.
Kumba ong ka Kyntien, I jingjaw um barit, ka pyndap ïa ki phnieng ka Duriaw” ka la urlong shisha, namar tang na ka daw ba ki Kmie ki kpa ne ki Longknie ki Longkpa kim don por shuh ban tehlakam ia ki khun ki kti ne ki Pyrsa ba ki la im laitlan ka la pynlong ruh ïa ki ban kin dang shlur ban leh ïa bun bah ki kam sniew kiba la ktah ha ka imlang ka sahlang. Namarkata, nai iawad shuh ïa kiwei pat ki daw ne ki tynrai ba ka jingsniew ka mih, hynrei to kum ki Longing Longsem ne ki Kmie ki kpa ngin ïa pyrshang ban hikai ïa la ki khun ki Kti ha la Rympei ka jong ka Rympei, namar dei tang ha la Rympei lah biang ban saiñ dur ïa ka hok long briew man briew ne ia ka akor ka burom kaba ngi lah ban iada na bun jaid ki kam sniew kam smeh ha ka imlang ka sahlang.