Bah Prestone wat ïalam bakla halor ka jingeh ki nonghikai Contract ong ki nonghikai

Shillong, Nailar 03: Hadien shisngi ba u Symbud Myntri Rangbah ka jylla u Bah Prestone Tynsong u la u la ong ba ka sorkar kam lah shuh thungkam biang da leilei ruh ïa ki nonghikai Contract kiba ym pass ïa ka Meghalaya Teachers Egibility Test(MTET) ha ka jylla wat hadien ba ka sorkar jylla ka la ai lad ba kin pyndep ïa ki interview bad ki eksam wad kam wat la ki la tam ka rta ruh.
U President jong Meghalaya Government Lower Primary School Contractual Teachers Association(MGLPCTA) u Babu Birbor Riangtem ha ka sngi Balang u la ther kylla ïa u Symbud Myntri Rangbah ka jyla da kaba kam ba kaei kaba u kren ka long kaba bakla.
“Ngi ïohi ba u Bah Prestone u la ong ba ka sorkar ka la pynlong ïa kita ki interview na bynta ki nonghikai Contract ba kin ïoh rung kam pura hynrei kane ka long kaba bakla namar kat haduh mynta kam pat ju pynlong kum ïa kita ki interview” ong u Babu Birbor
“Kat kum ka khubor kaba mih ha u Mawphor u Symbud Myntri Rangbah u la ong ruh ba kine ki nonghikai ki hikai 3 ne saw snem hynrei nga kwah ban ong ïa u Bah Prestone ba um dei ban ai tang ïa minimum year hynrei ïa ka average namar kiba bun ki nonghikai ki la hikai palat ïa ka 10 snem” u la ong shuh shuh
Ha kaba ïadei bad ka jingong u Bah Prestone ba ym don kam hikai shuh kiba thylli namar la pyndap da kiba pass MTET u Babu Birbor u la ong ba um kwah ban kynthoh eiei halor kane hynrei u kwah pat ba ka sorkar kan ai jingshai balei u Myntri Rangbah ha man ki jingïakynduh u ong beit ba ka sorkar ka dang eksamin ïa ki mat jingdawa jong ki.
“La bun snem u Myntri Rangbah u la eksamin mynta ngi kwah ban ïoh noh sa ka risol” ong u Babu Birbor.
“Nga kwah ban kylli ïa ka sorkar balei ïa kiwei ki nongtrei Contract jong ki tnad bapher bapher ki ïoh beit ïa ka tulop kaba neh beit ha shi lynter katba ki dang trei ïa kata ka kam balei ïa ngi pat ka sorkar ka ai tulop ha ki Pay Scale kumba ïoh kiwei ki nongtrei sorkar” u la bynrap.