Ba tuklar u MLA, hadien 13 snem urlong ka jingïoh Sub-Centre ha ka shnong Mawmuthoh

Shillong, Nailar, 30: Ka dei hadien 13 snem ba ka shnong Mawmuthoh ha Nongkrem Constituency ka la sakhi ïa ka jingwan plie paidbah ïa ka jaka ai jingsumar lane ka Health Sub Centre ha kane ka shnong myn ha ka 30 tarik u Nailar, 2022 da u MLA kane ka Constituency, u Bah Lambor Malngiang.
La mang tyngka ban tei ïa ka ïing Sub Centre ha u snem 2009 ha ka jaka ba la ai sngewbha da ka Kong Siyoda Kharmudai halor ka jingïateh kular ba kan ïoh kam ban trei ha ka tnad ka koit ka khiah.
La sdang tei ïa kane ka ïing Sub Centre ha u snem 2011 bad pyndep pat ha u snem 2012 hynrei ym shym la lah pat ban plie ïa ka ba kan trei kam na ka daw ka jingbym thung nongtrei ha katei ka Sub Centre.
Kawei pat ka daw ka long ka jingbym shim khia ka tnad ban pyndep ïa ka kular kaba la ïateh bad ka Kong Siyoda Kharmudai, kaba dei ka trai jaka.
Kum ban shu pynkynmaw ka Kong Siyoda ka la leit shong leit sah noh dalade hi bad ki khun ki kti ha katei ka ïing Sub Centre namar ka jingbym pat ïoh jong ka ïa ka hok ba la ïateh kular bad ka jingbym pyntreikam ïa kane ka Centre.
Kane ka la pynlong ïa u Bah Lambor kum u MLA ban tuklar la bunsien ïa kane ka phang bad dei ha ka 24 tarik u Jylliew, 2022 ha ka jingleit jurip jong u ïa katei ka Sub Centre ba u la buh ba la kumno kumno dei ban plie bad pyntreikam kam ïa ka ha shwa ban kut u bnai Nailar, 2022 da kaba pynbiang pynbit ïa baroh ki jingdonkam kumjuh ka jingïateh kular bad ka trai jaka.
Kane ka kam ka la urlong ha shwa ban kut u bnai kata ha ka 30 tarik u Nailar, 2022 bad ki paidbah ki la dap da ka jingsngew-kmen ban ïohi ba u MLA u la wan ban plie ïa ka ha ka jingïadonlang ki ophisar na ka tnad ka koit ka khiah, ki nongïalam shnong bad ka trai jaka kumjuh.