Shillong, K Lyngkot 16 : Ka sorkar jylla ka la rai ban pynsangeh noh shwa ïa ka jingthmu ban shna ia ka skywalk na kaba la thmu ban sdang na Barik Point ha ka nongbah hadien ba ki la ïoh pdiang ia ka kaiphod kaba la pyni ba lada ïaid shakhmat ïa katei ka projek kan sa don ka jingdheng kali kaba jur bha ha ka nongbah.
Na ka liang u Myntri Rangbah ka jylla, Conrad K Sangma haba kren bad ki lad pathai khubor u la ong, “Ngi hap ban buh teng shwa shipor ïa kane ka projek. Ka daw hi ka long ba ngi la ïohpdiang ïa ka kaiphod kaba bniah kaba pyni ba lada ngi sdang noh ïa ka kam hangne kan sa don ka jingdheng kali kaba jur bha ha kane ka surok.”
Shuh shuh u ong ba watla na ka liang ka sorkar ka la pynkhreh bha ïa ka plan hynrei ki la pyrkhat pat ba lada ki ïaid shakhmat ïa ka projek khlem artatien kan wanrah ïa ka jingkhapngiah kaba jur bha na ka bynta shisnem ne shisnem shiteng ei ei. Kumta u ong ba kane ka dei ka mat kaba ki hap ban bishar bniah la kin ap shwa haduh ban da ïoh da kano kano pat ka lad ba kin lah ban ïaid shakhmat
“Kumta ngi la rai ba na ka bynta ka bit ka biang lang jong ki paidbah, watla kane ka projek ka dei kaba paka eh, hynrei ban sdang ïa kane ka skywalk mynta kan wanrah ïa ka jingkhapngiah kaba jur ha ka nongbah bad khamtam eh ha ka lynti ban leit sha Khyndailad kaba khlem pep kan sa wanrah ka jingthnum kaba shyrkhei. Da kaba pynshong nongrim halor kine kiei kiei baroh ba ngi la shim ïa ka rai ba ngin buhteng shwa ban tei ïa kane ka skywald,” bynrap biang u Myntri Rangbah.
Shuh shuh haba ïadei pat bad ka projek pynkhuid pynitynnad ïa ka Wahumkhrah, u Myntri Rangbah u la pyntip ba la mang ïa ka projek kaba 30 – 40 klur na bynta kane.
