Ba thmu pynkynriah ka Sorkar ïa ka Marten sha Nonghali, pyrshah ka SNSPU

Shillong, Jylliew, 30: Ka Synjuk Nongsynshar Shnong Par Umkhen jong ki lai District ha ka jingïalang kaba la long ha ka sngi Saitjaiñ ka la shim ïa ka rai ban pynlong da ka jingïalang paidbah ha ka 6 tarik, Naitung, 2024 ha jingkieng Umkhen Thadrang halor ka jingthmu jong ka Sorkar Jylla ban pynkynriah noh ïa ka jaka thehñiut Marten na Mawlai sha ka shnong Nonghali ha u lum Sohlait ba jngai tang kumba 100 mitar eiei na ka Wah Umkhen.
Ki don kumba 15 tylli ki shnong kiba don ha syndah ka wah Umkhen bad lada ka Sorkar kan wanrah ïa kane ka jaka thehñiut ha lum Sohlait kan wanrah ïa ka jingjaboh jong ka wah bad ka jingshah ktah jong ki shnong kiba don ha syndah jong ka wah Umkhen.
Halor kane ka daw, ka Synjuk ka la ieng pyrshah ïa ka jingthmu jong ka Sorkar
“Namar lada wanrah ïa ka Marten ha kane ka jaka ka Wah Umkhen kan sa duh noh ka jingitynnad jong ka bad kan long ka jingjaboh ïa ka wah Umkhen kham palat ban ïa ka wah Umkhrah. Halor kane ka Synjuk ka sngewkhia jur ha kaba ïadei bad kane jingthmu jong ka Sorkar,” ong u President ka Synjuk Bah Super Rngaid.
“Lyngba une u kyrwoh, ka Synjuk ka kyntu ïa baroh ki nongshong shnong kiba don hapoh ka Synjuk kin shimkhia ban pyllait por khnang khnang ban ïashim bynta ha jingïalang paidbah ka ban sa long. Ngi kyntu ruh ïa ki Dorbar Shnong ban shimkhia bad ban mih ryntih ban pyni ïa ka jingpyrshah ïa ka Sorkar. Ka Synjuk ka khot sngewbha ruh ïa ki sengbhalang kiba don ka jingsngewkhia ban ïa snohkti lang khnang ba ngin lah ban jop ïa kane ka jing angnud jong ngi,” u la ong.
U Bah Rngaid u ïathuh ba ka jingpynlong ïa ka jingïalang paidbah ka long namarba ka Sorkar kam shym la sngap ïa ka jingdawa jong ka Synjuk watla bun ki jingthoh ba la ai ha ki tnat treikam ka Sorkar kiba ïadei bad kane ka kam.
“Haduh mynta ka Sorkar kam shym la sngap ïa ka jingdawa jong ka Synjuk,” ong u President jong ka Synjuk.