Jowai, Jylliew 19: Ka War Jaiñtia Students’ Union (WJSU) ha ka sngi Thohdieng ka la dawa na u Executive Engineer ka Jowai Central Division PWD (NH) ban shna pynbha biang ïa ki bynta bala sniew shaba palat jong ka surok NH 206 (Dawki-Amlarem.).
Ha kaba ïadei bad kane ka jingsniew palat ka surok Dawki-Amlarem NH 206 ha kiba bun ki bynta khamtam hajan ka transport department weighbridge, Amjaha RCC bridge, hajan ka jaka tih mawshun Dawki-Tambil bad ha kiwei de ki bynta kaba la wanrah ïa ka jingeh kaba khraw ïa ki nongleit nongwan, ki kali ba kit briew bad ki trok khaïi kiba kit ïa ki mar ki mata lyngba ka surokbah Dawki.
Ka seng ka la ong ba kaba phylla shuh shuh ka long tang katto katne bnai ba la dep shna ïa ka surok, hynrei kiba bun ki bynta jong ka surok kila sniew lut bad kane ka paw ïa ka jingbym shan slem jong ka surok ba la dep shna, kumta ka seng ka la dawa ïa katei ka tnad ban maramot noh kloi katba lah khnang ban suk ka ïaid ka ïeng.
Ha kaba ïadei bad kane, na ka liang ka seng ka la buh por hapoh shiphew (10) sngi ban pyndep ïa ka jingmaramot khlem da pynshlem shuh ïa baroh ki bynta ba sniew jong ka surok Dawki-Amlarem NH 206. Lada ym lah ban pynbeit ïa kane ka seng kan sa shim ïa ki sienjam kiba tyngeh na ka bynta ka jingmyntoi jong ki paidbah.
