Shillong, Risaw 04: Ïa ka Physical Efficiency Test (PET) kaba dang long mynta ban thungkam hapoh ka Civil Defence & Home Guards ha Shillong la hap ban pynkynriah noh na ka daw jong ka jingsniew palat ka jinglong ka suiñbneng kaba long ruh katkum ka jingbthah ba la ïoh na ka sorkar jylla.
Haba ïakren bad ki lad pathai khubor u Bah Comingone Ymbon, Myntri ka tnat Civil Defence & Home Guards hadien ka jingwan jurip ïa ka jaka ba la pynlong ïa ka PET kaba ha Civil Defence & Home Guards Complex, Mawdiangdiang, Shillong ba la synranlang da u MK Singh, IPS, Commandant General of Home Guards and Civil Defence, u Vijay Kumar Mantri, IAS, Commissioner & Secretary, CDHG, bad ki heh ophisar ka Civil Defence and Home Guards bad ba la lap ba kane ka jaka kam long shuh ban pynlong ïa ka PET kumta u la ïathuh ba ïa kane ka test la hap ban pynkynriah noh shwa shipor.
U la ïathuh ba hadien kane, ha ka step hi jong ka sngi Thohdieng u la khot ïa ka jingïalang jong ka Central Recruitment Board jong ka tnat bad ha shwa ban shim ïa kano kano ka rai na ka liang u Myntri u la kynduh ruh ïa ki kyrtong kiba ïakhun ïa ka test ne eksam ban pan jingmut na ki, ha shwa ban pynkynriah noh ïa ka sngi pynlong ïa ka Physical Measurement Test (PMT) bad ka Physical Efficiency Test (PET).
“Hadien ba la ïoh ka jingmynjur na ki kyrtong kiba ïakhun ïa kine ki eksam ngi la rai ban pynsangeh noh shwa shipor ïa ka PET bad ïa ka tarik bad ki sngi ban pynlong biang yn sa pyntip sha ki kyrtong lyngba ka phone bad ka website,” ong u Myntri ka tnat.
U la ong ba ki don haduh 445 tylli ki kam kiba lait ba kynthup ïa 4 tylli ki kam jong ki Sub Inspector, 284 ki kam na ka bynta ki Guardsman, 17 ki kam nongñiah kali bad 140 tylli ki kam ki Non-Combatant Employees (NCE) ha kaba ïa kine la pynlong test ha ki artylli ki Center jong ka jylla, kawei ha Tura bad kawei ha Shillong.
“Baroh ki kyrtong kiba la shah pdiang na ka bynta baroh 4 tylli ki kam, kata ka Sub Inspector, Guardsman, Driver bad Non-Combatant Employee (NCE) ha ka jylla ki long 22474. Katba ïa ka Physical Measurement Test (PMT) bad Physical Efficiency Test (Test) kaba la sdang ha Tura naduh ka 16 tarik u Nailur 2024 bad kaba la kut ha ka 26 tarik u Nailur 2024, bad ka PMT bad PET kaba la long ha Shillong ha Civil Defence & Home Guards Complex, Mawdiangdiang naduh ka 30 tarik u Nailur 2024 ka la dei ban pynkut noh ha ka 8 tarik u Risaw 2024, hynrei na ka daw jong ka jinglong ka suiñbneng la hap ban pynkynriah noh,” ong u Myntri.
U la ïathuh ba ïa ka PET ha Shillong la pynlong ha ka 3 tarik une u bnai Risaw 2024 bad ka sorkar ka la rai ban pynsangeh shwa shipor ïa ka test kaba dei ban long ha ka 4, 5,7 bad 8 tarik mynta u bnai 2024 tat haduh ban da pynbna da kumwei pat.
U Myntri u la ïathuh ruh ba ka sorkar ka la rai ba kito ki kyrtong kiba la pyndep ïa ka PMT bad kiba la dep shim bynta ruh ha ka PET ha ka 2 bad 3 tarik mynta u bnai 2024 kin ïoh biang ka lad ban shim bynta ha ka PET na ka daw jong ka jinglong ka suiñbneng ha kine ki 2 sngi ba la leit.
Kumta ïa ki mark ba la ïoh ha ka PET ba la pynlong ha kine ki 2 sngi ba la dep da ki kyrtong bad kito kiba jied ban shim bynta biang yn ym kheiñ shuh. Na ka liang ka Board kan sa kheiñ noh da ki mark ba la ïoh ha ka PET ha ka jingpynlong biang ïa ka test ha ki tarik ba thymmai.
Baroh ki kyrtong kiba pass ïa ka PET ha Tura bad Shillong ki long 6547, bad ki kyrtong kiba fail ïa ka PET ha Tura bad Shillong ki long baroh 5650 ngut.
