Khliehriat, Nailur, 22: Ki trai trok kiba hapoh ka lama jong ka Jaiñtia Hills Truck Owner Association (JHTOA), ki la byrngem ban pynlong da ka jingiakhi ban khanglad ïa ki trok jong ki karkhana dewbilat, kiba ju kit dewbilat bad kiba ju kit clinker na ki karkhana dewbilat kiba don ha East Jaiñtia Hills District, ka jingpynlong jingiakhih ka dei namar ka jingshah thok shah shukor ba man la ka por ki trai trok kiba dei ki trai jylla ha ki bor pyniaid jong ki karkhana dewbilat.
U President jong ka JHTOA, u Ma Biangshwa Shylla u la ong ba kane ka jingiakhih kaba la dep rai ha ka jingialang kaba la dep pynlong ha Tuber Takhniang, kan sdang ha ka 5 tarik Risaw, naduh ka por 10.00 baje mynstep.
U la ong ruh ba ka JHTOA ha ki 2 snem ba la leit ka la dep pynlong teng ïa kiba bun ki jingiakhih pyrshah ïa ki karkhana ha kaba wat na ka liang ka sorkar MDA ruh ka la dep pynmih ïa ka hukum kaba long ka jingpynbna (notification) ha kaba iadei bad ka bai kit bai bah kaba long ha ka dor T. 7 ha ka shi kilomitre, hynrei ki karkhana dewbilat ki khlem pyntreikam satia ïa ka hukum ba la pynmih da ka sorkar.
Kumjuh ruh ha ka jingiakynduh bad u Deputy Commissioner ka East Jaiñtia Hills District ruh la mynjur ban ai bai kit bai bah ïa ki trok kiba hapoh ka lama jong ka JHTOA kumba 60 tylli haka shi sngi, hynrei ki ioh tang kumba 15 tylli ki trok haka shi sngi ban kit ïa ki mar, kumta namar ka jingbym iaid beit ki kam kumba la dep rai, na ka liang ka JHTOA ka la shim ïa ka synjam ban pynlong biang da ka jingiakhih ban khanglad ïa ki trok jong ki company dewbilat kiba kit jingkit.
