Shillong, Naiwieng 22: Ka United Democratic Party (UDP) kaba la rai ban pynbna ïa ka thup ba nyngkong ki kyrtong ha ka sngi Ba-ar ka la pynsahngeh noh shwa hadien ba ki san ngut ki Khasi-Pnar ki shah siat ïap ha ki pulit Assam ha ka step sngi Ba-ar.
Haba kren ha ka jingïalang ba lyngkot ba la long ha ophis treikam ka party u President ka UDP u Bah Metbah Lyngdoh u la ong ba kum shi bynta ban burom ïa ki mynsiem ba la khlad noh bad ban ïasnoh mynsiem bad kiba haïing hasem jong ki ka party ka rai ban sahngeh shuwa noh.
Na ka liang ka UDP ha shuwa ban sdang kane ka jingïalang ba lyngkot ka la pynlong ruh ïa ka jingsngap jar ba shipor ban kymaw burom ïa kine kiba shah siat ïap.
Haba kren bad ki lad pathai khubor hadien ba la wai ka jingïalang, u Bah Metbah u la ong ba kane ka jingshah siat ïap ki Khasi-Pnar ka dei ka kam riewkhlaw jong ki Pulit Assam kaba donkam ba pynrem jur ban ban leh eiei.
U la ïathuh ruh ba na ka liang ka party ka la ïoh ban shong jingïalang bad u Myntri kam poh ïing u Bah Lahkmen Rymbui ban pan jingshai kaei kaba la jia hadien ba u la wan jurip da lade sha katei ka jaka.
“Ha ka jingshisha ka sorkar ka la rai ban plie noh shen ïa ka Police Out Post ha Borato ha kine ki khyndiat sngi ban wan katkum ka jingïathuh u myntri kam poh ïing,” ong u Bah Metbah.
Ha kane ka sngi na ka liang ka UDP ka pynpaw ruh ba ka sngewdei ba ka sorkar jylla ka dei ban aiti sha ka NIA ne CBI ban tohkit halor kane ka jingshah siat ïap.
Shuh shuh ha u la ong ba ka party hi da kawei ka sur ki dawa ba ka sorkar ka dei ban shimkhia ban ïada ïa ki paid Khasi-Pnar kiba shong ba sah ha kane ka thaiñ.
U la ïathuh ruh ba mynta ka sngi ka party kan sa leit ban ai mynsiem halor kane ka jingjia sha kiba haïing hasem ban ban jurip ruh ïa katei ka jaka.
