Ba shah pynsangeh kum u Acting Syiem ka Hima Nobosohphoh, pan jingpynshai u bah Ferdinance

Mawkyrwat, Naitung 08 : U Bah Ferdinance Syiemiong, uba dei u Acting Syiem barim jong ka Hima Nobosohphoh Syiemship, mynta ka sngi ka 8 tarik u Naitung, 2026 u la pan jingpynshai na ka Khasi Hills Autonomous District Council (KHADC) halor ka jingshah pynsangeh treikam noh jong u kum u Acting Syiem ka Hima Nobosohphoh Syiemship.
Haba kren sha ki lad pathai khubor, u Bah Ferdinance Syiemïong u la pynpaw ïa ka jingsngewlyngngoh ba ka KHADC ka la pynskhem biang ïa u Bah Kawangbor Syiemiong kum u Syiem ba pura jong ka Hima Nobosohphoh Syiemship, katba ma u pat u dang bat ïa ka kam kum u Acting Syiem bad khlem kano kano ka jingpynbna ne jingpyntip sha u.
Ym tangkata, u bah Ferdinance u la ong ba ha ka 1 tarik u Naitung, 2026, u Bah Kawangbor Syiemiong ryngkat bad ka jingïasynran lang jong ki pulit na Mawkyrwat Police Station ki la leit plie ïa ka Ophis Syiem kaba don ha shnong Rangblang, South West Khasi Hills District. “Kumno ma nga pat nga dang ïoh pdiang ïa ka shithi kaba pyntip ba la pynsangeh treikam ïa nga kum u Acting Syiem tang ha ka 4 tarik u Naitung, 2026”, pynpaw u bah Ferdinance ïa ka jinglyngngoh.
Shuh shuh, u Bah Ferdinance u la pynpaw ba watla ka shithi ba u la ïoh pdiang na ka KHADC ka 26 tarik u Jylliew, 2026 ka la thoh ba la pynsangeh treikam ïa u kum u Acting Syiem, hynrei ha ka 29 tarik u Jylliew, 2026, u dang ïoh pdiang ïa kawei pat ka shithi na ka KHADC kaba pan jingtip na u halor ka jingdon ki shnong kiba hap hapoh ka Elaka ne ka Hima Nobosohphoh Syiemship.
Namarkata, halor kine ki jingjia ne halor kine ki jingpynkulmar jingmut, u Bah Ferdinance Syiemiong u la pan jingpynshai na ka Khasi Hills Autonomous District Council (KHADC) khnang ban tip paidbah ïa ki jingshisha baroh ha kaba ïadei bad ka jingpynsangeh treikam jong u bad ka jingpynskhem biang ïa u Syiem ba pura jong ka Hima Nobosohphoh Syiemship.