Ba shah pynliem ha ka Nangkiew Irat, nang jngai ka Langsning ban rah ïa ka nam lahduh ha ka SPL

Shillong, Nailar 23 : Ka jingkyrmen jong ka Langsning ban rah ïa ka nam lahduh ha ka lympung jong ka Shillong Premier League ka la nang jngai hadien ba ka la mad noh ïa ka jingshah rem ha ka Nangkiew Irat ha ka jingïakhun ïa ka kylla kaba ar ha ka Shillong Premier League ha kane ka sngi Ba-ar ha madan Third Ground, Polo.

Ka Langsning ka la mad ïa ka jingshah rem da tang 1-0 kol ba la thep da u Shaibor Nongrum ha minit ba 81 kaba pynlong ïa ka Nangkiew Irat ban don mynta ha kyrdan ban lait na ka jingshah pynhiar kyrdan.

Shwa kane ka jingïalehkai ka Nangkiew Irat ka don 10 point katba ka Langsning ka don 18 point ha kyrdan ba ar, hynrei da ka jingjop ha kane ka sngi ka Nangkiew ka don mynta ha kyrdan ba hynriew da 13 point.

Ha ka jingïakhun ha ka kylla ba nyngkong (first leg), ka Nangkiew ka la lah ban pynïakhaid da mar 2-2 kol bad ka Langsning ha ka jingïalehkai kaba long ha ka 22tarik Jylliew, hynrei ha kane ka sngi pat ki la lah ban khur ïa ka jingjiop. Kumta mynta ka la ïoh ban knieh noh ïa ka kyrdan ba san na ka Shillong Lajong kaba don 11 point. Katba ka Langsning pat ka dang shah tam haduh 8 point ha ka Mawlai kaba lamkhmat hajrong duh jong ka jingkhein point.

Ki bor pynïaid ki pyntip ruh ba ka jingïakhun kaban long ha ka 26tarik pat kan long hapdeng ka Malki bad ka Mawkhar kiba dei ki kynhun kiba don shapoh jong ka miej ïa khein point.