Shillong, Jymmang 29 : Khyndiat sngi hadien ka jingpaw pyrthei ïa ka jingshah ieh khun swet ïa ka Dangar Dombah Border Upper Primary School, na ka liang u Nongai buit jongka tnad Pule Puthi ka sorkar jylla, Bah HM Shangpliang u la pynïoh da ka skim kaba 4.50 lak tyngka na ka Chief Minister Special Development Fund (CMSDF) ban shna ïa ki jaka leit bar kiba paka.
Na ka liang u Bah Hima u la ïathuh ba mar ïa ïohi ïa ki khubor ba ki khynnah ki hap ban leit bar sha ki khlaw ki btap mardor u la ïathuh ha u Myntri Rangbah bad kumta u la ïoh ïa ka jingïarap kaba 4.50 lak tyngka na bynta jong ki.
Ïa kane ka work order u Bah Hima u la aiti sha u President ba thymmai jong ka Managing Committee uba dei ruh u Rangbah Shnong ka shnong Dangar u Bah Ham Syiemlieh, kaba la mang lang ban shna ïa ki jaka leit bar na ka bynta ki khynnah skul bad kumjuh ruh ïa ki nonghikai.
Ha kajuh ka por haba ïadei pat bad ka kynrum kynram kaba mih halor ka jingai bamja sngi ïa ki khynnah jong kane ka skul, u Bah Hima u la ong ba ka sorkar hi kan leh ïa kaba donkam bad kan ym mab satia.
Na ka liang jong ka Kong Bel Marbaniang kaba dei ka Principal bad kumjuh ruh ka Secretary ba thymmai jong ka Managing Committee ka la pynpaw ka jingsngewnguh ïa u Bah HM Shangpliang u ba la kloi ban ïarap da kaba pynïoh ïa ka skim ban ban shna ïa ki jaka leit bar kiba paka na ka bynta ka skul baroh kawei.
