Ba sdang lumthup biang ki ñiut, yn weng ïa ka jaka pynïeng kali kamai na lad Thomas Jones: L.D Lakiang

Jowai, Naitung 24: U Chairman ka Jowai Municipal Board (JMB) ma Lasooki D Lakiang ula pynpaw ka jingsngewrem halor ka jingsdang biang ban lumthup ïa ki ñuit ha ki bynta ka surok jong ka Iawmusiang kata ha Lad Thomas Jones bad ha madan siat thong ka Sieñ Raij Jowai.
Ula ong kane ka dei tang na ka daw ka jingbym don shuh ïa ka jingkitkhlieh kum ki briew halor ka jingkhuid jingsuba jong ka shnong ka thaw, kiba la hun ban leit bret ïa kitei ki ñiut kiba wanrah na ki ïing ki sem kat shaba ki lap.
Shuh shuh ula ong hadien bala dep pynlong ïa kynduhlang mynta ka sngi kata naduh u Deputy Commissioner ka WJHD, ki bor pynïaid ka Thomas Jones, Mission Hospital bad ki nongkitkam ka KJP Synod kila shim ïa kawei ka rai ryngkat ki bor pynïaid kali (traffic) bad ka PWD ban weng noh ïa katei ka jaka pynïeng ïa ki kali kamai Tourist (Alto) ha Lad Thomas Jones da kaba pynïaid noh da ki kali na baroh arliang u surok (Two-Way).
La pyntip na ka bynta ka jaka ban pynïeng ïa kitei ki kali kamai la pynbeit noh ha Loomsooïung New Hills haka jaka jong u ma N. Challam, khnang ban katei ka jaka ba rung sha Thomas Jones kan long kaba kylluid bad kaba khuid ba suba.
Ha ka juh ka por la mana ba ym dei shuh ban pynlong jaka breit ñuit ïa katei ka jaka, na ka bynta kito ki dukan kiba don ha surok ki dei ban buh lang bad ki CCTV khnang ban lap ïa kino kino kiba leh pyrshah bad yn pynshitom katkum ka aiñ.
Kum ka tnad JMB kaba peit ïa ka jingkhuid jingsuba ïa ka shnong Jowai hi baroh kawei, ula pyntip wat ïa ka jaka siat thong la mana ba ym dei shuh ban leit bret pathar ïa ki ñiut ha katei ka jaka, hynrei la buh kyrpang ïa ki Bin heh tang na ka bynta kito ki dukan kiba dei hok ban leit thep ïa ki ñuit hapoh kitei ki Bin.
Na ka bynta ban pynbha pynbiat ïa ka surok Thomas Jones ula ong shen yn sa ïakren bad u MLA ka Jowai halor kumno ban pynitynnad ïa katei ka jaka.