Ba sahteng ka ishu Them Iewmawlong, MRSSA, rai ka HYC ban khih pyrshah ïa ka sorkar

Shillong, Jymmang 10 : Ka Hynniewtrep Youth Council (HYC) lyngba ka central executive committee (CEC) ha kane ka sngi Saitjain, ka la shim ïa ka rai bad ka pynbna ruh ban pyrshah ïa ka jingbym lah jong ka sorkar jylla ban weng ïa ki jingeh kiba la sahteng la slem bha kiba kynthup ïa ka jingpynkynriah ïa ki 342 tylli ki longïing na Them Iewmawlong bad ruh ban pyntreikam ïa ka Meghalaya Residents Safety and Security Amendment Bill (MRSSAB) 2020 ban khynra ïa ki jingwan rung kyrthep ki mynder sha kane ka jylla.
Haba kren sha ki lad pathai khubor, u President ka HYC u Roykupar Synrem u la ong, “Ngi la rai ban pynlong ïa ki prokram pyrshah ïa ka sorkar bad ki buit pynslem jong ka. Ngin ym sngap jar bad ïa ki jingtip ba bniah yn sa pyntip katkum ka jingdonkam.” Katkum ka jingong jong u, ka ishu kaba ïadei badka jingpynkynriah noh ïa ki 342 tylli ki longiing na Them Iew Mawlong ka la sahteng mynta la kumba 6-7 snem.
“Ka sorkar ka la pynthikna ïa ki paidbah ka jylla khamtam na ka thain Khasi bad Jaintia ba ïa kine ki nongshong shnong yn pynkynriah noh sha kiwei pat ki jaka. Ka sorkar ka la dep ai ïa ki katto katne ki jaka bad ka la wanrah ïa ka blueprint halor ka jingthmu jong ka ban tei ïa ki iing sah hynrei mynta kynsan kynsan kiwei pat ki mat ki la mih,” u la ong.
Halor ka jingpynslem ban pyntreikam ïa ka MRSSAB, 2020 bad kumjuh ïa ka ILP, u President ka HYC u la ong, “Ngi la ïohi ba u Myntri Rangbah ka jylla naduh u snem 2023 u la pynthikna bad pyntip sha ngi ba ïa ka MRSSAB la pynphai biang sha ka sorkar jylla bad ba ka sorkar jylla kan sa khot ïa ka jingïalang bad baroh. Hynrei naduh u 2023 haduh mynta ym pat don kano kano ka jingïalang ba la khot da ka sorkar halor kine ki ar tylli ki mat.”
Shuh shuh, ka HYC ka la buh jingkylli ruh halor ka jingbym lah jong ka Anti Narcotic Task Force (ANTF) ban shim khia ïa ki case NDPS ha ka jylla.
U President ka Seng u la ong ruh ba naduh u Jymmang jong u snem ba la dep ki la sdang ïa ka jingïakhun pyrshah ïa u drok. “Hooid ha ka por ba jur bha ka jingïakhih bad ka rai jong ngi ban ïaid paidbah sha secretariat ha u bnai Naiwieng, ka sorkar jylla lyngba ka shithi ka la pynthikna ban shim ïa ki sienjam kiba donkam ban pyntreikam ïa ki jingdawa jong ka HYC kiba kynthup ïa ka jingthaw ïa ka kynhun ANTF ban tehlakam ïa ki mukotduma jong ka NDPS.
Hynrei u ong pat, ba wat hadien ba la buh ïa ka ANTF hynrei haduh mynta ym pat shym la rejister wat tang kawei ka mukotduma da ka thanat pulit jong ka ANTF. “Ka jingkylli ka long balei ba ka ANTF kam shim ïa ki sienjam kiba donkam pyrshah ïa ki mukotduma NDPS,” u la ong. “