Ba pyrshah ïa ka jingthmu pynkynriah ïa ki Harijan, pynkylla ka Sorkar ïa ka Blue Print

Shillong, Nailar 04: Ka Sorkar Jylla ha ka sngi Palei ka la pyntip hakhmat ka Ïingbishar Meghalaya High Court ba la pynkylla noh ïa ka Blue Print ha kaba ïadei bad ka jingpynkynriah ïa ki jaidbynriew Harijan kiba sah ha Them iew Mawlong.
Dang ha ka 13 tarik u Naitung ka Sorkar ka ladep ban pynkhreh ïa ka Blue Print halor ka jingpynkynriah ïa ki Harijan sha Mawbah ha ka jaka ba don marsyndah bad ka RP Chest Hospital. Kane ka jingthmu jong ka Sorkar ka la pynmih ïa ka jingpyrshah kaba jur naduh ki kynhun sengbhalang bapher bapher, ka Dorbar Shnong Mawbah bad ki nongshong shnong.
Ha ka hukum ba la pynmih ka Ïingbishar ka la ong, namarba ka Sorkar Jylla ka la ïoh ka jingai jingmut na ki katto katne, ka Sorkar ka la rai ban pynkylla noh ïa ka Blue Print kaba ka la dep pynkhreh. Shuh shuh la pyntip namarba ka jingpynkhreh biang ïa ka Blue Print ka dang ïaid mynta shakhmat, ka Ïingbishar kan shong bishar biang ïa kane ka kam hadien saw taïew, kata, haduh ka 16 tarik, Nailur, 2022.
Kum ban shu pynkynmaw hangne, ha ka 13 tarik u Naitung ka Sorkar ka pyntip hakhmat ka Iingbishar ba ka la pynkhreh ban ai jaka 3 akar na bynta ban tei ïa ka ïing kaba lai mala ïa ki Harijan ha ka shnong Mawbah.