Ba pynthut u slap la pynkynriah noh ïa ka semi final hapdeng ka Meghalaya & Manipur

Shillong, ïaïong 10: Ka jingïakhun semi final hapdeng ka kynhun ïalehkai kriket ki kynthei jong ka Meghalaya pyrshah ïa ka Manipur ha ka 2nd NECDC Senior Women Tournament 2025 ha Rangpo, Sikkim, ka la shah pynthut noh hynne ka sngi Palei, ha kaba tang ar tylli ki bol la ïoh ban kawang.
Kumta la pynkynriah noh ïa kane ka jingïalehkai ha ka sngi Thohdieng, kata mynta ka sngi. Ka Meghalaya ka la ïoh rung sha ka semi final da kaba lamkhmat ha ka Group A, katba ka Manipur ka la wan ba ar ha ka Group B.
Ha kawei pat ka liang, ka semifinal ka la jam shakhmat kumba la pynbeit, ha kaba ka Sikkim, ka jylla kaba pdiang ban pynlong ïa kane ka lympung, ka la pynliem ïa ka Nagaland da 1 wiket ha ka jingïakhun kaba ïakhaid bha.
Kine ki ar tylli ki kynhun ki la long ki lahduh ryngkat lang lane joint winner ha ka sien pynlong nyngkong ïa kane ka lympung ha u snem ba la dep hadien ba u slap u la pynthut bad khlem ailad ïa ka jingïalehkai ba kan jam shakhmat hynrei hynne ka sngi Palei ka Sikkim ka la khanglad ïa ka Nagaland tang na bynta 70 ron naki 17.4 ober shuwa ba kan tied pyndep pura ïa ki 20 ober ban beh ïa kane ka thong, da ka kamai shi ron ha ka bol kaba khatduh ban khur ïa ka jing jop.