Nongpoh, K’lyngkot 06: Hadien ka jingmih noh u Bah Victor Rani kum u MDC ka NPP bad uba la leit ban pynïasoh sha ka Party Congress ban pan ticket na ka bynta ban ïa khun ha ka election MDC na Jirang Constituency, ki nongïalam ka NPP Jirang Block mynta ka sngi ki la shim syndon da ka rai ban pynieng hi da u MLA u Bah Sosthnes Sohtun kum u kyrtong MDC ka NPP na Jirang Constituency.
Kum ban pynkynmaw, ki don ruh 3 ngut ki rangbah kiba la pan ticket na ka party NPP ba kynthup ïa u Bah Albertus Lapang, u bah Kitbok Khongiong bad u Bah Balawan Syiemiong, hynrei namar ka jinglyngkot ka por ban poi noh ka election MDC, ki nongïalam ryngkat kitei ki 3 ngut ki la shim ïa ka rai ban pynïakhun hi da u MLA u Bah Sosthenes Sohtun kum u kyrtong MDC ka NPP na Jirang Constituency.
Ïa kane ka rai, ki la shim ruh mynta ka sngi ha ka jingïalang kaba la long ha Byrnihat, kaba dei hadien ka jingïashong pyrkhat bad ka jingïathir jingmut na baroh ki nongïalam ba kynthup naduh ki nongïalam ka NPP Jirang Block, ki nongïalam ka NPYF bad ka NPP Women’s Wing lem bad kiwei ruh ki riew rangbah bad ki nongïalam na ka thaiñ Jirang.
Haba kren sha ki lad pathai khubor, u Bah Siewdor Syngkli, President ka NPYF Jirang Block bad ka Kong R.U Kharbani Spokesperson, ki la pyntip ba ïa ka rai ban pynïeng kyrtong hi da u MLA, la shim rai da baroh ki nongïalam bad ki don ruh ka jingkyrmen kaba skhem ba ka NPP kan ioh khur ïa ka nam jop ha kane ka election MDC ban sa wan na ka Jirang Constiteuncy.
Ki la pynpaw ruh ba ka jingshim rai ban pynïakhun da u MLA, ka dei ruh namar ka jinglyngkot ka por, kaba dei hadien ka jingphet noh u MDC u Bah Victor Rani naka party NPP bad na ka bynta ka jingjop ka party NPP, ki la shim lang ïa kawei ka rai ba u MLA un ïakhun kum u kyrtong ka NPP na Jirang kaba long ka jingkyrmen ba ka NPP kan ioh rah ïa ka nam jop.
Shuh shuh, ki la ong ruh kam don kano kano ka jingpher hapdeng ki para nongïalam bad wat kitei kiba la pan ticket bad da kawei ka rai, ki la shim ba u MLA un long kum u kyrtong MDC ka NPP na Jirang bad kim don ruh ka jingartatien ba ka NPP kan jop, ba kum ki nongïalam ki la shim ïa ka rai ba rangbah ban dang pynkhlaiñ shuh shuh ïa ka NPP party ha Jirang na ka bynta ka jingjop ba don burom u MLA ha kane ka election MDC ban wan, ki la bynrap.
