Ba mad ka jingkyrduh um, trei lang ki 4 shnong ban wad tyllong um, kular u MLA ban pynioh da ka skhim

Nongpoh, Jylliew 17: Ki saw tylli ki shnong ba hap ha ka Nongpoh Constituency kiba kynthup ïa ka shnong Mawjong, Pahamshiken, Pahambir them bad ka Pahambir Lum ki la ïa rai ban ïa trei lang rygnkat ryngkat na ka bynta ban pynioh ïa ka tyllong um, kaba dei hadien ba ki paidbah nongshong shnong jong kitei ki shnong ki hap ban mad ïa ka jingkyrduh um hapoh ki shnong ki thaw.
Kum ban ïa mir jingmut halor kane ka jingeh ba ki paidbah ki mad ïa ka jingkyrduh um, ki nongïalam Shnong kitei ki 4 shnong mynta ka sngi ki la lum da ka jingïalang ha ka ïing Dorbar Hall ka Shnong Pahambir Lum ha kab la don ryngkat ruh u MLA ka Nongpoh, u Bah Mayral Born Syiem na ka bynta ban ïa kren bad ban ïa phylliew jingmut ban wad ïa ki lad ban pynioh ïa ka tyllong um bam umdih ki paidbah.
Ha kane ka sngi nalor u MLA bad ki paidbah nongshong shnong la don ryngkat ruh u rangbah Shnong ka Shnong Mawjong, u Bah Mathius Maring, Rangbah Shnong ka Pahamshiken, u Bah Seril Maiong, Bah Denet Makri Rangbah Shnong ka Pahambir Them, Testing Maring Rangbah Shnong Pahambir Lum bad u Bah Sensi lyngdoh, uba dei u Lyngdoh ka Raid Nonglyngdoh.
Lyngba kane ka jingïakynduh lang, la pyntip ba ki saw shnoing ki la ioh ïa kata ka tyllong um bad ka dei pat sha kawei ka shnoing ha kaba ki donkam ban ioh ïa ka NOC bad ka jingeh ka long ba ki hap ban siew ïa ka bai NOC kaba long T.1.20 lak ban ioh ïa katei ka tyllong um bad lyngba ka jingïaphylliew jingmut ka la long ka jingkyrmen ïa ki saw shnong ba u MLA u la kular ban ïarap na ka bynta ban pynpoi um sha katei ka shnong bad kynthup ïa katei ka bai NOC ban ioh ïa ka tyllong um.
Haba kren ruh ha kane ka sngi na ka liang u MLA, u Bah Mayral Born Syiem, u la ai khublei kyrpang ïa ki nongïalam shnong bad ki paidbah kiba la don kajuh ka mynsiem ban ïa trei lang na ka bynta ban pynioh ïa ka um bam ka umdih kaba bit ba biang bad kum u MLA ruh u la ai ka jingkyrshan ïa ki saw shnong na ka bynta ban pynmih ïa ka bai NOC khnang ba kitei ki shnong kin ioh ïa ka tyllong jong ka umbam umdih sha kitei ki saw shnong.
Shuh shuh, kumba ki shnong ki dang duna ha kaba pyndap ïa ka bai NOC, u MLA u la kular ban pyndap bad ha kajuh ka por ruh un pyrshang ban thaw ki lad ki lynti lyngba ki skhim khnang ba kane ka jingangnud ki paidbah ban ioh ïa ka umbam umdih kaba biang kan long kaba jop bad kaba ai jingmyntoi ïa ki paidbah, u la bynrap.