Nongpoh, Naitung 03: Na ka daw ka jingsngewkhia halor ka jingjynjar ha ka leit ka wan ba ki paidbah ki kynduh jingeh na ka jingsniew palat ka surok, ki paidbah nongshong shnong ka shnong Umling Umsarang mynta ka sngi ki la mih paidbah ban maramot ïa ka surok shi bynta ban pynsuk ïa ka leit ka wan ki paidbah nongshong shnong.
Haba maramot ïa kane ka surok, la ïalam hi ruh da u rangbah Shnong, u Bah Throlin Thangkhiew lem bad kiwei ki nongïalam shnong bad la ïa snoh kti lang ruh naduh ki longkmie, longkpa bad ki khun samla ka shnong Umling Umsarang.
Haba maramot ïa kane ka surok, ka shnong ka la hap ban pyndonkam ïa ka Trok Dumper da kaba kit ïa u mawria ba la pan na ka NHAI ban siang ïa ka surok ha ki bynta ba la sniew palat, khnang ba kan nym pynjynjar ïa ki paidbah ba leit ba wan khamtam ha kane ka por lyiur ba ka surok ka la dap da ka ktieh suda.
Bun ki riew rangbah ka shnong, ki la pynpaw ka jingsngewkhia halor ka jingsniew palat kane ka surok, namar ki la mad ïa ka jingeh kaba khraw ha ka leit ka wan la bun phew snem mynta.
Haba kren bad ki lad pathai khubor, u Rangbah shnong ka shnong Umling Umsarang, u Bah Throlin Thangkhiew, u la ong ha ka jingshisha na ka liang ka bor shnong ki la ju leit mih sha u MLA bad sha ka tnad PWD ban pyrkhat lem ïa ka jingeh ki paidbah, hynrei kumba long haduh mynta kam don kano kano ka dak ka shin ba kin pynbha ïa katei ka surok, ha kaba ki paidbah ki dang hap ban syrtok ha ka leit ka wan.
Shuh shuh, u la ong ruh la dap 40 snem ba ka shnong ka la ïaid lynti naduh ba la seng ïa kane ka shnong, kaba don tang kumba 700 meter ka jingjngai na ka surok National Highway-6 ha Ri Bhoi bad ka long kaba sngewsih pat ki paidbah ki mad ïa kajuh ka jingeh bad la dei ka por ba ka sorkar, ki nongmihkhmat bad ka tnad PWD ka dei ban ai noh da ka surok rong ban suk ki paidbah ha ka leit ka wan, u la bynrap.
