Ba ka don ka mariang kaba itynnad, la ithuh ïa ka Meghalaya kum ka ‘heaven of India’ ong u Lat

Shillong, Naitung 23: Kum ka dak ban pyni ïa ka jingangnud jong ka jylla ban pynneh pynsah ïa ka sawdong sawkun, ka Meghalaya Legislative Assembly da ka jingïatreilang bad ka tnat Forest ka la pynlong ïa ka prokram thungdieng hapoh ka jaka jong ka Meghalaya Legislative Assembly kaba thymmai ha Mawdiangdiang, Shillong.
Ha kane ka prokram la donlang u Lat ka jylla u Chandrashekhar H. Vijaya Sankar, u Myntri Rangbah ka jylla u Conrad K. Sangma, u Lamphang ka Ïingdorbar Thaw aiñ u Thomas A. Sangma, u Symbud Myntri Rangbah u Bah Prestone Tynsong, U Symbud Lamphang u Timothy D. Shira, ki myntri ka sorkar jylla kiba kynthup u Rakkam A Sangma, u Marcuise N Marak, ka Dr M Ampareen Lyngdoh, u AT Mondal, u Opposition Chief Whip u Bah Ronnie V Lyngdoh bad kiwei ki MLA na ki seng saiñ pyrthei bapher bapher.
Haba kren ha kane ka sngi u Lat ka jylla u Chandrashekhar H. Vijaya Sankar u la ïaroh ïa ka jingohshrong jong ka Assembly complex ba thymmai bad u la ïaroh ruh ïa kane ka prokram thungdieng kum ka sienjam kaba ïohi jngai. U la pynpaw ka jinglong kongsan ban thung ïa ki dieng kiba napoh ka shnong, ki dieng kiba lah ban shna dawai, bad ki dieng kiba la jan duh noh, da kaba buh ruh ka jingkhuslai halor ka jingdon ki kolshor kiba lah ban ktah ïa ka jinglong jyrngam jong ka sawdong sawkun.
U Lat ka jylla u la pynkynmaw ba ka Meghalaya ka dei ka bneng ka India (“heaven of India),” naba ka don ïa ki jingthung kiba im kiba long kyrpang bad ka dei ka kamram ban pynneh pynsah ïa ka bad kumjuh ruh ka jingdon ka mei mariang kaba itynnad. “Kaei ka jingkitkhlieh jong ngi ban wanrah biang ïa ka jingïaryngkat ka sawdong sawkun?” u la kylli da kaba kyntu ïa ka jingïatreilang halor kane ka bynta.
Katba na ka liang u Lamphang ka Iingdorbar Thaw aiñ u Thomas A. Sangma, u la banjur ba kane ka jingthung dieng ki dei ki dak ka jingïalong kawei da ka jingangnud ban ïada ïa ka sawdong sawkun. U la pynbna ba ki dieng ba la thung da ki heh ki haiñ yn sa thoh ruh ïa ki kyrteng jong ki, kaba long ka dak jong ka jingsmai kaba neh ban pynlong ïa ka Meghalaya kaba jyrngam.
“Ïa ka new Assembly complex la buh ka thong ym tang ka dak ban pynïaid ïa ki kam thaw aiñ, hynrei na ka bynta ka jingjyrngam, ka jaka kaba itynnad bad kaba sawa da ka sur jong ka jingthmu ban pynneh ïa ki jait jingim kiba kordor,” u la ong.
Katba u Myntri Rangbah u Conrad K. Sangma u la ong ba kane ka jingsdang ban thung ïa ki dieng ka dei ban neh ha ka khana pateng bad ka jingleh kaba pynsah kynmaw, kaba don ka jingïadei bad ka pyrthei ban ïakhun pyrshah ïa ka jingkylla ka suiñbneng. U la pynkynmaw ïa ki kyntien na ka phlim Gladiator: “Kaei kaba ngi leh mynta ka pynsawa ïa ka jingim ka bymjukut,” da kaba ong ba ki dieng ba la thung mynta ka sngi kin ïeng kum ki jingmyntoi ïa ki pateng ban wan.
U la ïathuh ruh halor ki jingjop ka jylla hapoh ka One Citizen One Tree initiative, kaba la lam sha ka jingthung ïa ki dieng kiba la jankot 2 klur tylli ha kylleng ka jylla Meghalaya.
U Myntri Rangbah u la kyntu ïa baroh ki MLA ba kin wan jngoh manla ka por bad ban sumar ïa la ki jong ki dieng ba ki la thung kaba pyni ïa ka khubor jong ka jinglong trai bad ka jingaiti shimet ban ïada ïa ka sawdong sawkun.
Halor ka jinglong jingman ka jingtei ïa ka Assembly Complex ba thymmai, u Myntri Rangbah u la pyntip ba dang don sa katto katne ki bynta technical jong ka main hall kiba dangsah na ka daw ka jingdonkam ïa ka sound bad security, kane ka project ka la jan dep artat bad la khmih lynti ba kan dep noh bad ban ïoh pyntreikam nohshen.
Ha kane ka programme la sakhi da ka jingïashim bynta ki MLA na ki seng saiñ pyrthei kiba kynthup ïa u Rupert Momin, ka Kong Santa Mary Shylla, u Bah Gavin M Mylliem, u Kartush R Marak, u Bah Renikton L Tongkhar, u RG Momin, u Arbinstone B Marak, u Pongseng R Marak, Dr. Mizanur Rahman Kazi, u Sengchim N Sangma, u Jim M Sangma, u Brening A Sangma, u Bah Mayralborn Syiem, u Bah Wailadmiki Shylla, u Bah Pius Marwein, u Bah Mathew Beyondstar Kurbah, u Bah Nujorki Sungoh, u Bah Charles Marngar, u Ian Botham K Sangma, u Bah Methodius Dkhar, u Bah Gabriel Wahlang, u Subir Marak, u Bah Lahkmen Rymbui, ka Miani D Shira, u Bah Adelbert Nongrum, u Rupa M Marak bad u Bah Heaving Stone Kharpran.