Shillong, Nohprah 06 : U Symbud Myntri Rangbah ka Jylla, Bah Prestone Tynsong ha ka sngi Balang u la ong ba u la bthah ïa ki bor distrik kumjuh ïa ka tnad pulit ban peitngor bad buddien halor ka jingjyllei ki jingleit pan pisa ne donation da ki kynhun bad ki seng bapher bapher kumjuh ki riewshimet ha nongbah Shillong.
Haba kren bad ki lad pathai khubor, u Symbud Myntri Rangbah ba dei ruh u Myntri Kampohiing ka jylla, u la ong ba kane ka jingbthah kadei hadien ka jingïoh jingtip ba ki don ki kynhun kiba leit ban dawa bad pan pisa khlem da ïoh jingbit na ki bor distrik katkum ki kyndon.
“Ka long kaba shai, ngi la dep bthah ïa ki bor distrik bad ka tnad pulit ba kan leh da kaba tyngeh ïa kitei ki kynhun kiba donkti ha ki kam dawa pisa ha Shillong,” u la ong.
Shuh shuh u ong ruh ba khlem ka jingbit na ka sorkar lane na ki Deputy Commissioner kino kino kim lah satia ban shu leit pan ne lum pisa.
