Ba jur ki askiden kali, pyrkhing ka tnad Pulit ia ki Kali ba pynkheiñ kyndon ha sor rit Nongpoh

Nongpoh, Nailar 08: Ban khanglad na ka jingniah Kali khlem akor bad khlem da bud ïa ki kyndon jong ka aiñ ñiah kali katum kaba ju wan rah ki jingjia ba sngewsih, ki bor pulit ka Nongpoh Traffic Brach ki la sdang ban pynlong da ka jingtalasi ïa ki Kali paidbah ban tehlakam katkum ki kyndon jong ka aiñ ñiah kali na ka bynta kito ki Kali kiba pynkheiñ ïa ki kyndon ñiah kali ba la buh da ka sorkar.
Kum ban pynkynmaw, bun ki jingjia ba sngewsih ki la jia hapho ka surokbah jong ka National Highway-6 ha Ri Bhoi bad bun ki mynsiem ki la duh ei ei bad ka daw hi ka long ba bunsien ki nongñiah kali kim ju bud satia ïa ki kyndon aiñ jong ka jingñiah kali (Traffic rules & Motor Vehicles Act).
La sakhi ruh halor kane ka jingtehpyrkhing ki bor pulit ïa ka jingñiah khlem akor ïa ki Kali paidbah ha kaba ki pulit na ka Nongpoh Traffic Brach ki la bteng ban talasi ne bat ïa ki kali paidbah na ka bynta ban peit ban khmih la ki la bud neem ïa ki kyndon aiñ ñiah Kali.
Na ka liang ki bor pulit ka Nongpoh Traffic Branch mynta ka sngi ruh ki la pynlong ïa ka jingtalasi ïa ki Kali ba pynkheiñ ain ha ka surokbah National Highway ha Nongpoh bad bun ki Kali kiba pynkheiñ ain ki la shah daiñ kuna katkum ki kyndon ba la buh da ka sorkar.
Kumba la pyntip da ki bor pulit, kane ka jingtalasi ïa ki kali paidbah ka dei na ka bynta ban pyrkhing na ka bynta kito ki Dribar ba dih buaid, ki dribar bym deng seat belt, ki Kali ar shaka bym deng Helmet bad kiwei ki kali kiba ym bud katkum ki kyndon ba la buh da ka sorkar.
Shuh shuh, la pyntip ruh ba kane ka jingtalasi ïa ki Kali paidbah ka long ban tepyrkhing na ka bynta kito kiba pynkheiñ ïa ki kyndon ñiah Kali bad tang na ka daw ka jingbym bud ïa ki kyndon aiñ ñiah kali bunsien ka mih ka jingjia ba sngwsih bad ruh don ki mynsiem ba lui luid ki duh ei noh ïa la ka jingim, ong ki bor Pulit ka Ri Bhoi.