Shillong, Ïaiong 06 : Ka Jaiñtia Students’ Union (JSU) ha ka sngi Saitjaiñ ka la ai khublei ïa u Symbud Myntri Rangbah ka jylla, Ba Sniawbhalang Dhar uba la don ka bynta kaba kongsan ha kaban pynïoh ïa ka MPSC Examination Centre ha Jowai hapoh ka por kaba lyngkot.
Ha ka jingpynlait khubor, ka Union ka la pynpaw ruh ïa ka jingsngewnguh ïa ka sorkar MDA 2.0, hapoh ka jingïalam jong u Myntri Rangbah ka Jylla Conrad K. Sangma, kaba la pynlong shisha ïa kane ka jingkyrpad ba la slem bha jong ki paidbah ka Jaiñtia Hills.
Nalor ka jingwanrah ïa ka MPSC Examination Centre, ka Jaintia Students’ Union ka kyntu bad pynkynmaw ïa ka Sorkar ïa ka jingdonkam ban kyrshan ïa ki samla da kaba buh ïa ki jaka thoh eksamin NEET, CUET, bad NET ha Jowai.
“Kane kan pynlah ïa ki samla pule bad kiba kwah ban ïaleh eksamin, khamtam kito kiba sah ha ki thain ba kham kyndong ba kin lah ban wan thoh ïa ki eksamin khlem da ïakynduh ïa ki jingeh,” ong ka kyrwoh na ka seng.
