Ba iehbeiñ ka Meghalaya, theh ka Assam da ki kam pynroi ha khappud : Bah Jodish Dkhar

Nongstoiñ, Rymphang, 18: Ki paidbah nongshong shnong kiba shong ha shilynter khappud bad ka Assam haduh kine ki sngi, ki dang ïakynduh shibun ki jingeh ha baroh ki liang na ka daw jong ka jingduna jong ki kam pynroi ba ka sorkar ka pynpoi sha ki paidbah.
Hynrei ka FKJGP ka kyntu ïa ki rangbah bad ki paidbah jong baroh ki shnong kiba don ha shilynter u pud, ba kim dei ban shah pynbiej ha kitei ki briew jong ka sorkar Assam ïoh ba kin babe kylla shisien ka sngi.
U Bah Jodish Dkhar President ka Federation of Khasi Jaiñtia & Garo People Langdongdai Area Unit, u la ïathuh ba ki don kumba 10 tylli ki shnong kiba don ha ki thaiñ Malangkona, ba ki briew jong ka sorkar Assam ki ju wan barabor ban pynbiej bad kular ban pynïoh bai bam ïa ki khynah skul bad pynïoh ïa baroh ki jait skhim kiba ïadei bad ki kam pynroi ha ki shnong ki thaw.
Utei u nongïalam ka seng u la ong ruh ba ka daw kaba kongsan eh ka dei na ka jingbym kheiñ snep jong ka sorkar Meghalaya ïa ki paidbah jong katei ka thaiñ ha kaba ka la shu iehnoh beiñ kumto la palat san phew snem.
U la ong ba ka jingsngap mynthi jong ka sorkar ban pynbeit bym ïa u pud u sam ba thikna, ka dei ka daw bah kaba pynlong ïa ka sorkar Assam ba kan shim kabu ban pynbiej lai phew jait ïa ki paidbah.
U la ong ruh ba ka jingdon jong ki katto katne ki riew shim kabu na ka bynta ban ïoh nong jingmyntoi shimet kiba ju kyrshan ïa ka sorkar Assam ha baroh ki liang, ka dei ka daw ka ba kongsan kaba pynlong ïa ki paidbah ba kin ïakynduh shibun ki jingeh.
Utei u nongïalam ka seng u la ong ruh ba bun tylli ki skul kiba don ha ki shnong khappud, ki la shah knieh ha ka Assam bad da ki spah kilomitar ki jaka ka la dep knieh, hynrei ka sorkar Meghalaya kam tip ei ei.
Kumta ka seng ka kyntu jur ïa ka sorkar Meghalaya ba ka dei ban phai khmat nyngkong eh sha ki paidbah kiba shong ha khappud bad ban theh ïa ki kam pynroi ha kitei ki jaka, khnang ba ki paidbah kin sngew trai namar lada ka sorkar ka ñiew shilliang khmat kumba long haduh mynta ki paidbah kim banse ban leit pynïasoh noh bad ka Assam.