Shillong,Nohprah 05 : Ka madan ban shna thymmai ha Upper Lumparing kan don lut naduh ki jaka jngi, ki jaka ïalehkai athletics, ki jaka ïalehkai volleyball, basketball bad kiwei pat ki jaka ïalehkai nalor ba kan kham heh wat ïa ka madan ba heh tam ha ka jylla ka madan JN Sports Complex ha Polo.
Ïa kane la ïathuh da u MLA ka Shillong South Bah Sanbor Shullai hadien ba la wan jurip ïa ka jaka ban tei ïa ka madan ïalehkai ha ka shnong Mynsaiñ ha kane ka sngi Palei.
Ha kane ka sngi jurip la don lang naduh ki nongïalam shnong, ki nongïalam jong ka sports club ryngkat ki ophisar.
Na ka liang u MLA haba kren ha ka jingïalang u la ïathuh ba naduh u snem ba la dep ki la ïa kren ban pynheh ïa katei ka madan kaba don ka jingheh haduh lai akar.
U la ïathuh ruh ba na ka bynta ban ïoh ïa katei ka lai akar na ka liang ka Raid kan ai bujli pat haduh 15 akar ka jaka sha ka tnad khlaw kaba wat na ka lïang u Myntri Rangbah ka Jylla ruh u pynpaw ïa ka jingkmen bad ka jingsngewtynnat ïa ka jingtyrwa ban ai bujli haduh 5 shah ka jaka kaba heh.
Na ka lïang u MLA u la ong ruh ba mynta kin pynkhreh noh ïa ka Detailed Project Report (DPR) khnang ban ïoh noh ïa ka jingmang pisa ban sdang trei noh ïa ka kam. U la ïathuh ba da ka jingïoh ïa kane ka jaka ïalehkai kan plie lad ïa ki nongshong shnong ha ka ïohkam ïohjam bad kan kyntiew ruh ïa ka roi ka par ka ïoh ka kot hapoh ka shnong bad ka thaiñ baroh kawei.
Shwa kane, na ka liang u President ka Lumparing Sports Club u Bah Ïaineh Nongkhkaw u la ai ka jingïaroh ïa ka Sorkar Jylla bad ïa u Myntri Rangbah, u Conrad K Sangma uba trei borbah ban pynsted ïa ki kam pynroi.
U la ong ruh ba hapoh ka jingïalam u Bah Sanbor Shullai kum u MLA ryngkat u Rangbah Shnong ha ka jingtreilang ka tnat khlaw ka Sorkar Jylla lem bad kiwei ki tnat treikam yn sa lah ban pynurlong ïa ka madan ha Upper Lumparing na ka bynta ka jingmyntoi jong ki khun samla bad ba kin lait na ki jingma kiba sniew kiba ap thap ïa ka jingim jong ki.
