Shillong, Naiwieng 16 : Arngut ki samla kynthei, kata ka samla Wanhunlang Khyllait bad ka samla Rilarympei Diengdoh ki la ïoh ïa ka khusnam ba kyrpang na ka Rabon Sing Kharsuka Memorial Committee namar ka jingïoh ban khur heh mark tam ha ka sobjek Khasi ha ka Bachelor of Arts (BA) bad ruh ha ka Master of Arts (MA).
Ïa kitei ki arngut ki samla la pynkup burom hynne ka sngi Ba-ar ha ka jingïalang kaba long ha Khasi National Dorbar Hall kum shi bynta ban kynmaw burom ïa u nongthoh ba khraw tam ba ka Jaidbynriew ka pynmih, u Pahep Rabon Sing Kharsuka ha ka lyngkhuh sngi khlad kaba 112 hynne ka sngi.
Lah ruh ban kdew hangne ba ka samla Rilarympei Diengdoh kadei ka samla pule ha skulbah NEHU Shillong katba ka samla Wanhunlang Khyllait pat kadei na St. Mary’s College, Shillong. Ïa ki khusnam ha kane ka sngi la pynkup burom da u Kongsan, Dr. Sylvanus Lamare, Principal jong ka St. Edmund’s College bad ruh na u Symbud Kongsan, Bah Ransom Sutnga ryngkat ka jingdonlang ka khun ksiew tun jong utei u nongthoh ba khraw, Kong Eldora Betsy Lyngdoh kumjuh ruh u Dr. Herbert Lyngdoh uba mihkhmat na ka Kur Lyngdoh nalor kiwei kiwei.
Shwa kane, u Kongsan ha ka jingkren u la ong ba ha ka por ba wan ki phareng bad mishoneri ka la don ka jingtieng hapdeng ki paid Khasi bad dei kane kaba la pynlong ïa ka Jaidbynriew ban sei haduh lai ki mawbyrsiew. “Kita ki dei u Jeebon Roy Mairom, Radhon Sing bad u Rabon Sing Kharsuka. Lada phi peit ïa u Jeebon Roy u la thoh shaphang ki kot kiba ïadei bad kiwei ki jaidbynriew bad pynwan sha ka Ktien Khasi. U la thoh ruh shaphang ka Niam Khasi. Katba Radhon Sing pat u la pynsan ïa ki kitab jingphawar kiba dei ka sneng ka kraw ïangi ki Khasi bad kadei ka kot kaba biang tam na ka bynta ban bat ïa ka rukom im jong ngi ki samla Khasi,” u la ong.
Haba ïadei pat bad u Pahep Rabon Sing, u Kongsan u la ïathuh une u thoh ïa ki khana, ka Niam Khasi bad kumjuh ruh ïa ka Phawar. “Ngi donbok shibun ba kine ki lai ngut ki la mih bad ki trei ryngkat ryngkat, u la bynrap shuh shuh.
U Bah Ransom ba dei ruh u kurim jong i Kong Eldora, u la ong ba ka jingsam ïa katei ka khusnam kan ai mynsiem shuh shuh ïa ki samla Khasi ban leh bha ha ka sobjek Khasi khamtam ba kadei kyrpang ïa kiba heh mark tam ha katei ka sobjek.
U la pyntip ruh ba nalor ba ka Committee ka la trei borbah na ka bynta ban pynsah nam shuh shuh ïa utei u rangbah, mynta ki la dep ruh ban pynbha ïa ka Iingsah jong utei u radbah kaba don ha Mawmluh ïa kaba la ai kyrteng da ka Rabon Sing Cottage.
Shwa kane, na ka liang i Prof. Streamlet Dkhar ba dei na ka Khasi Department NEHU ha ka halor ka jingnoh synñiang jong u Pahep Rabon halor ka thoh ka tar, ka la ong, “Dei ban lehkmen haba lyngkhuh snem jong uno uno nongthoh ba la noh synñiang ha ka thoh ka tar Khasi.”
Shuh shuh ka ong ruh ba dei lyngba u Pahep Rabon Sing uba la sdang nyngkong ban buh jingthoh bad lum lang ban pynroi ïa ka Ktien Khasi namar ym pat don ki briew kiban lum ban lang ha ka dur jong ki jingthoh.
Ka la banjur ruh ba donkam ban ïakhun wat ban ïoh jingithuh noh ïa ka lyngkhuh snem ba khlad jong kum ka Rabon Sing’s Day, kum ka burom kumba la ai lang ïa kiwei pat ki khraw pyrkhat jong ka Jaidbynriew.
