Lada ia kren ia ka umbam umdih lah ban ong ba ki paidbah Meghalaya ki dang donbok shisha namar kim pat mad kumba long kiwei pat ki jylla ha ka ri India ba ka jingiaknieh um ka long shaba palat. Kumba long haduh mynta hi, ki nong Meghalaya ki dang ioh ia ka um khlem da donkam eh ban da thied rem dor bad lada ki siew ruh kan dei ha ka dor kaba duna bha lada nujor bad kiwei kiwei ki jaka. Tangba ka long pat kaba ima lada ki paidbah naduh mynta kim sngewthuh ia ka dor jong ka ioh kumno re kumno kan poi ka por ka syllad ka jingtyrkhong tang katta shaei shuh yn sa leit wad um.
Ka jingbym sumar shuh ia ki sawdong sawkun khamtam ki tyllong um bad ka jingpom pathar ia ki deing ki siej kadei ka dak kaba ima bha. Kumta lada kane ka jingmlien kam kylla ka Meghalaya shisien ka sngi kan long ka jylla kaba tyrkhong um hapdeng ka jingpawnam ka jingjur u slap ha ka por Lyiur lane kum ki ong kata ka ri shyiap ba sngem tam.
Lada ngam jylliew hi, ka um ka long kawei na ki jingdonkam ba kongsan tam bad ba kordor tam ha kane ka pyrthei kaba baroh naduh khunlung haduh ki tymmen ki donka beit. Kumta ka kylla long ka bynta kaba donkam tam na ka bynta baroh ki jingthaw ba im bad ki ju pyndonkam ia ka ha ki kam ba bun jait kum ha kaba dih, shet jingshet, pynkhuid, bad rep. Ka long kaba donkam ban pyrkhat ia ka jingktah kaba ki rukom leh jong ngi man ka sngi ki lah ban ktah ia ka koit ka khiah jong ki lynti iaid ka um ha ki shnong ki thaw bad ki sawdong sawkun jongngi.
Sngew dei ruh ban ai jingmut katto katne kumno ban pynneh pynsah ia ki tyllong um da kaba pynshlur haman ki longiing ba kin thung ia ki dieng met kiba lah ban bat ia ka um ha ki kper ki phrah ne ki lyngkha rep namar kane kan iarap pat ban pynneh ia ka um slap ha ka por lyiur khlem da tuid ei sha rud. Kaba ar ka long ban pynshlur ba ki shnong ki thaw kin don ia kita ki jaka shnong lane ki raid ha ki jaka ba long sngem ban thung kham bun ki dieng khnang ba ki tyllong um kin neh. Kane ym tang ba ka iarap ia ki nongshong shnong ban pahuh ka umbam umdih hynrei kan iarap ruh wat ban pynneh ia ki dohum dohwah bad ka pynngad ia ki nongshong shnong namar ki ioh ban leit sait jain sait nep sha wah.
Ha kawei pat ka liang donkam pat ban pynsngewthuh namar ki don ki jingjia ba watla ki shnong ki don ia ki tyllong um kiba biang hynrei don pat ki nongshong shnong kiba leh pathar ha ki sawdong sawkun jong ka. Kumta halor kane sngew dei ban ong ba wat na iing na sem donkam ban pynshlur ban pyndonkam da ki tiar pynkhuid kiba iadei bad ka mariang. Kumba long mynta bun ki tiar pynkhuid iing ki don ki dawai kiba lah ban pynsniew ia ka mariang, kumta donkam ban pyndonkam noh da ki dawai pynkhuid ba kynja mariang lane ban jied ia ki mar kiba la thoh ba ki long kiba iadei bad ka mariang.
Kawei pat ka long ban pyndonkam da ki sboh mariang namarba ki sboh dawai ki lah ban pynsniew ia ki tyllong um jong ngi. Pyrkhat ban pyndonkam da ki sboh mariang kum ka sboh haba thung jhur thung syntiew bad kiwei kiwei. Dei ruh ban pynduh noh ia ki jaboh kiba lah ban pynmynsaw ha ka rukom kaba dei : Ia ki tiar kiba lah ban pynmynsaw kum ka rong, ki battery, bad ki tiar elektrik ym dei ban shu bret ha ki jaka bret jaboh. Ia kine ki tiar donkam ban wanrah sha ka jaka bret jaboh ba shyrkhei ban pynthikna ba kin ioh ban bret bha, ban iada na ka jingtuid jong ki tiar shapoh khyndew bad ban pynjaboh ia ki tyllong um.
Nangta, bun ki tiar iing kum ki dawai, bad ki umphniang engine ki lah ban pynsniew ia ki tyllong um jong ngi. Pynthikna ban bret bha ia kine ki tiar bad kiar na kaba theh ia ki ha ka thliew um khnang ba kin ym kut ha ki tyllong um. Ka jingbret jaboh ka long ka daw bah jong ka jingjaboh ha ki lynti um jong ngi, kumta donkam ban pynthikna ban bret ia ki jaboh jong phi ha ka rukom kaba dei bad pynshlur ia kiwei ban leh kumjuh.
Kumta ha kaba khatduh hi, ka rai ka shong ha ki paidbah la ki kwah ban pahuh um ne kyrduh um, ki hap ban pyrkhat lypa naduh mynta na bynta ka pateng ban wan ba kin ym ngat ha ka apot ka jingtyrkhong um tang na ka daw ka jinglalot spah, kwah rhah lut tang ialade da ki nongshong shnong jong kane ka pateng ba mynta.
