Asian Continental Championships: Shah jied lai ngut ki nongñiah thuk thuk ka jylla ha ka Indian Downhill Team

Shillong, Nailur 08: Ka long ka jingsngewsarong ïa ka jylla bad ka thaiñ hi baroh kawei hadien ba ki lai ngut ki nongïakop ñiah thuk thuk ka jylla ki la shah jied ha ka poh ka Indian Downhill Team na ka bynta ka Asian Continental Championships. Ka ban sa long ha Kerala, Trivandrum naduh u Risaw ka 26 tarik haduh 29 tarik, 2023.
Na ka liang jong ka Cycling Federation of India kan sa ïoh ban pynlong ïa ka jingkilanmet lane ka training camp na ka bynta kine ki nongñiah thuk thuk kiba la shah jied ha u Nailur ka 9 tarik haduh ka 30 tarik.
Kine ki nongïakop ñiah thuk thuk kin hap ban sah hapoh Kerala naduh ka tarik kaba buh haduh kaba kut jong ka Asians.
Kane ka long ka sien kaba nyngkong ba ki nongïashimbyta ha ka Cyclists/Mountain Bikers napoh ka jylla kin shah jied ban mihkhmat ïa ka ri India. Kine ki lai ngut ki kynthup ïa u Apshai Griffith Niangti, u Meban Aiboklang Suiam, ka Anissa Dariti Lamare ( ka thei nong India ba nyngkong ban shimbynta ha ka Downhill Mountain bike ride) ki dei ki nongñiah thuk thuk ka jylla kiba la shah jied.
U Kevin John Khyllait nongñiah thuk thuk ka jylla (cross- country rider), u ruh un sa shim bynta ha kane ka training camp hashwa ka jingpynbna khadduh ban jied ïa ki nongïalehkai ha ka thup kynhun ban mihkhmat ïa ka India.