New Delhi, Rymphang 21 : Ka India kan ïakhun ar tylli ki jingïakhun paralok pyrshah ïa ka Qatar ha ka 25 tarik bad 28 tarik mynta u bnai kum shi bynta ban pynkhreh ïa ka lympung AFC U-17 Asian Cup.
Katei ka kynhun hapoh ka jingïalam jong u Bibiano Fernandes kum u coach, katei ka kynhun U-17 ki shynrang ki la ïoh ban rung sha katei ka lympung jong ka AFC U-17 Asian Cup ha u snem ba la dep bad ki la pyndep ïa ka jingkilan met ha Goa naduh u Naiwieng ba la dep.
Katei ka kynhun ka la dep ruh ban ïakhun paralok pyrshah ïa ka kynhun U-20 jong ka United Arab Emirates bad ruh ïa ka kynhun U-17 jong ka Uzbekistan ha u bnai ba la dep ha kaba ki la ïoh ban pynliem da 1-0 kol ïa ka Uzbeks.
Uwei na ki rangïalehkai ba kham paw ba ka Ri ka sei ha kane ka kynti ba mynta u dei u Vanlalpeka Guite, uba la ïoh ruh ban khur ïa ka nam rangïalehkai ba kynsai ha ka SAFF Championship dang shen.
Ha ka rta kaba 16snem, utei u rangïalehkai u la ïoh ruh ban pyni ïa ka jingtbit jong u ha ki lympung kilan met bad kumta ka don ruh ka jingkyrmen ba un lah ban ïai bteng ban ïalehkai bha da ka thong ruh ba un lah ban khring wat ïa ki klob jong ka Indian Super League ba kin soi ïa u.
“Kine ki jingïakhun ki dei kiba kongsan bha ïa ngi ban ïoh ïalam ïa ka kynhun sha ka kyrdan kaba ngi lah ban ïalehkai bha ha ka AFC U-17 Asian Cup. Ha ka samoi ba la dep ngi lah ban poi tang ha ka Round 16 bad kumta mynta ka kynti ngi dei ban poi beit kham shakhmat shuh shuh,” ong u Fernandes haba ïadei bad ka jingïalehkai paralok kaban sa long shen kum shi bynta ban pynkhreh na bynta ka Asian Cup.
Lah ban kdew hangne ba ka India ka la ïoh ban khur ïa ka jingjop ha ka U-17 AFC Asian Cup tang shisien kata ha u snem 2016 bad bad naduh katei ka poi tang sha ka quarter final. Kumta ka don ka jingkhmih lynti ba kane ka kynhun ba mynta kan kilan met tyngeh khnang ba kan lah ban ïalehkai bha bad ruh wat ban jam shakhmat ha katei ka lympung kaba la buh ban long ha Thailand ha u Jymmang mynta u snem.
