Khliehriat, Iaiong 09: Ka Jaiñtia National Council Khliehriat Circle mynta ka sngi ka la leit iakynduh ïa u Executive Engineer jong ka tnat bor ding, MePDCL, Khliehriat Division, u bah M.Pohshna bad iakren halor ka jingbym ioh bor ding ki nongshong shnong jong ka shnong Dkhiah East (Lad-Sutnga) kaba la kynjoh mynta sha ka ar taïew kaba la buh jingeh ïa ki paidbah ba pyndonkam bor ding bad ong ba ki la don haduh kumba shi spah tylli ki ïing kiba la shah ktah ha kane ka jingduh bor ding.
“Ka jingduh bor ding ki ïing ha Dkhiah East (Lad Sutnga) ka dei namar ka jingsniew u transformer 250 kv u ba don hapoh kane ka shnong bad ki paidbah ki hap ban mad ïa ki jingeh namar kiba bun jait ki kam hap ban trei da ka bor ding electrict, kane ka la pynsah umdum ïa ki nongshong shnong kiba duh bor ding, namar ha kine ki sngi ban im ban shong ban sah ha ka jingdum khlem ka jingshai bor ding ka long kaei kaei kaba ym lah shuh tang ban batai ruh namar la jan baroh ki kam la don kam beit da ka bor ding electrict. Ka Jaiñtia National Council-Khliehriat Circle hapoh ka jingïalam u bah Diamond Bareh, uba dei u Working President JNC -KC da ka mynsiem ka jingsngewkhia hadien ka jingud ki paidbah sha ka seng, ki nongïalam bad ki dkhot ki la leit ban iakynduh ïa u E.E bad ki la buh ruh da ka dorkhas ha u Executive Engineer MePDCL, Khliehriat Division ban pynsngew ïa kane ka jingiakynduh mawsiang ki paidbah kiba shong ba sah ha ka shnong Dkhiah East ha Lad-Sutnga kiba la shong khlem bor ding mynta kumba la ar taïew tam ei ei, ka seng ka dawa ruh na ka ophis jong u EE ban pynioh bor ding noh kham kloi khlem da pynslem shuh khnang ban nym buh jingeh than ïa ki paidbah nongshong shnong kiba duh bor ding” ong u kyrwoh na ka seng.
“Ha kane ka jingiakynduh, u EE u la ong ba ka ophis ka la ioh ka jingtip ïa kane ka jingbym ioh bor ding ha Lad Sutnga hynrei namar ka jingbymdon transformer hapoh ka Division yn hap ban wad lad wad lynti shwa ban pynioh kloi katba lah ban pynioh ïa u transformer, u la ong ruh ha ka jingshisha kane ka dei tang ka kam kaba rit ym dei kaba shitom haduh katta, hynrei don kam tang ban ioh ïa u transformer, yn da la lah ban ioh transformer na ka liang jong ka ophis kan sa shim khia ban trei kloi ïa ka kam ban pynioh bor ding sha ki paidbah ha Lad Sutnga”.
“Ïa ka dorkhas ba la buh hakhmat u EE ka seng ka la phah copy ruh sha u Superintendent of Engineer ka tnat MePDCL Jowai bad ka seng ka la ïa kynduh ruh bad u hapoh ka ophis trei kam jong u S.E kaba don ha Jowai bad na ka liang jong u S.E u la ong ba um pat ioh jingtip ïa kane ka kam, hynrei mar shu tip na ka liang jong u SE u la leh ïa kaba don kam na ka bynta ban pynioh transformer ïa ka shnong Dkhiah East (Lad Sutnga), u la ong ruh ba na ka liang ka ophis jong u SE kan pynkloi katba lah ban pynioh bujli da uwei pat u transformer ha Dkhiah East bad haba kylli shaphang ka bai bor ding ( Electricity Bill) jong ki ïing ha Lad Sutnga, utei u SE u la ong ba kat kum ka jingtip jong u, ka long ba kan ka iaid beit lait tang katto katne tylli ki ïing ki ba dang sah bai bor ding te yn sa ot noh ruh ïa ka connection jong kito ki ïing ki bym siew bai bording”
Na ka liang jong ka seng ruh ka la kyntu bad dawa jur ruh na ka ophis trei kam jong u Executive Engineer, Khliehriat Division bad kumjuh ruh na ka ophis trei kam jong u SE- MePDCL Jowai ban pynkloi noh ban pynioh bor ding ïa ki nongshong shnong ka Dkhiah East- Lad Sutnga khnang ban nym buh jingeh ïa ki paidbah kumjuh ruh ïa ki khynnah pule bad ïa kito kiba trei jingtrei da ka bor ding ha kiba bun ki kam, pynkut u kyrwoh na u bah u Diamond Bareh, Working President JNC-KC.
