Ar sien lynter rah ka Mawlai ïa ka burom jong ka SSA Women’s League

Shillong, Naitung 30: Ki thei ïalehkai ka Mawlai SC sa shi sien pat ki la lah ban sei madan ïa ka sap lehkai jong ki ban rah ar sien lynter ïa ka namlahduh jong ka lympung lehkai Shillong Sports Association’s Women’s League 2023 kaba la long ha SSA Stadium, First Ground, Polo, hynnin ka Sngi Saitjaiñ jong ka taïew ba ladep.
Ha kane ka jingïalehkai kaba shongshit ka Mawlai, kaba la rah ïa ka namlahduh jong ka Women’s League ha u snem ba ladep da kaba pynliem ïa kajuh ka kynhun kaba ki ïakhun mynta u snem, ka la ïoh ban jop da 3-1 kol ïa ka Laitkor SC hakhmat palat hajar ki nongpeitkai kiba la wan sakhi ïa ka jingïakhun final hapdeng kine ki ar kynhun. ïa ki kol la thep da i Sunalinda Iawren (15′), i Charlinda Nongtdu (40′) bad i Ideibanri Kharpan (50′) na ka bynta ka Mawlai SC, katba ka Iawanlang Nongbet (36′) ka la ïoh ban thep ïa ka shi kol na ka bynta ka Laitkor SC.
Ki thei ïalehkai ka Mawlai ki la dap da ka jingsngewkmen hadien ba la jam sha kaba kut jong kane ka jingïalehkai, katba ka Laitkor ka la mad ïa ka jingsngewsih kaba kthang namar kim shym la lah ban ïoh ïa kaei kaba ki angnud wat hadien ba ki la ïalehkai bha ha kane ka samoi da kaba jop lynter tad haduh ka jingïakhun final.
Ha kane ka sngi, ka Mawlai ka la lah ban ïalehkai janai naduh kaba sdang. Bad lyngba ka Marbarin Nongrum ka Mawlai ka la ïoh shibun ki kabu ban shna ïa ki bol bad pynrung ïa ki na ka bynta ki player khmat, bad kawei na kine ka la plielad ïa ka Iawren ban khyrwit jlang ïa ka bol shapoh kol tang hadien 15 minit ba la ïaid ka jingïakhun.
Hadien ba la sdang ïa ka kylla kaba ar, ka Laitkor ka la wanphai da ka rukom lehkai kaba khampher kaba la pynshongshit ïa u paid nongpeitkai, hadien ba ka Majaw ka la ïoh ban pynbuh bol na ka bynta ka Nongbet kaba la khyrwit jlang shapoh kol. Kane ka jingïoh ban pynïakhaid ka la ai mynsiem ïa ka Laitkor, hynrei tang hadien katto katne por ka Mawlai ka la ïoh ban tehlakam biang ïa ka jingïakhun ha ka 40 minit ka Charlinda Nongtdu ka la ïoh ban thep ïa ka kol kaba ar shuwa ba ka Ideibanri Kharpan kan pynthikna namjop ïa ka Mawlai lyngba ka kol ha ka 50 minit.
ïa ka song tyngka kaba 30,000 ryngkat bad ka khusnam sha ka kynhun ba jop la sam da i Kong Isawanda Laloo, IAS bad i ba dei ruh i Director of Sports and Youth Affairs, i la ïoh ban don ryngkat ha kane ka sngi kum i kongsan, katba ka Laitkor ka la ïohpdiang ïa ka song tyngka kaba 18,000. Kiwei pat kiba la don ryngkat ha kane ka sngi ïakhun final jong ka Women’s League ki kynthup ïa ki dkhot kiba la rangbah jong ka SSA, kiba kynthup ïa i Bah Karsing Kurbah, Bah Prosper Warjri bad i Bah Freddy Kharpran, kiba la ïoh bynta ban sam ïa ki khusnam sha i Priyanka Latam (Best Goalkeeper) jong ka Lumparing SC’s , ka Nisilia Majaw (Player of the Tournament) jong ka Laitkor bad i Sunalinda Iawren (Player of the Final) jong ka Mawlai.