Shillong, Risaw 25: Ka Khasi Students’ Union (KSU) kam lah ban shu sngap jar halor ki khubor kiba la mih ha kine ki khyndiat sngi halor ka jingthrang ki katto katne tylli ki kynhun ban pynpoi noh ïa ka lynti rel ym tang ha Byrnihat hynrei shaduh sha Shillong. Kumjuh ruh ka jingbym kren shai ka sorkar ban pynsangeh shwa shipor ïa ka jingthmu ban pynpoi lynti rel sha ka Bri U Hynñiewtrep tad haduh ban da ïoh ki aiñ kiba khlaiñ bor ban tehlakam ïa ka jingwan buhai shnong pathar ki bar jylla bad mynder ri hapoh ka jylla.
Katkum ka kyrwoh la ong ba ka daw tynrai hi ba ka KSU ka pyrshah ïa ka jingthmu ban pynpoi lynti rel ha ka jylla kam dei namar ba ka pyrshah ïa ka ‘ka roi ka par’ hynrei ka sngewthuh shai ba lada ka rel kan wan kan pynsuk arshah ïa ki briew nabar ban rung ban mih katba mon ha jylla Meghalaya bad kane kan plie shuh shuh ka lad ïa ki ba kin buhai shnong ha Ri Khasi katba mon namar ym don aiñ ne kyndon ba khlaiñ bor ban khanglad ïa ki ban seng longïing hapoh u pud u sam ka jylla.
Ka KSU ka kwah ban pynkynmaw ïa ki paidbah ka Bri U Hynñiewtrep halor ki jingïakynad ba ju jia khah khah hapdeng ki Khasi bad kiba nabar naduh u snem 1979 ter ter bad wat haduh mynta. Kine ki jia dei namar ba ki nongwei ki la leh trai khlieh bad thombor ïa ki paid Khasi. Ka jingbun paid ki nongwei ha ka Bri U Hynñiewtrep ka pynshong syier ïa ki Khasi namar kine ki poiei ki la knieh ïa ka khaïi ka pateng, ki la shongkha pathar ïa ki thei Khasi, ki la klun ïa ki jaka sorkar bad wat ki jaka shnong bad ruh ki la ïoh wat ban long nongmihkhmat ha ka ïing dorbar thaw aiñ. Ka jingknieh noh ka jong kine ki nongwei ïa ka hok bad ka iktiar u Khasi ka pynlong ïa ki ban sngewmeng bad leh donbor ïa ki paid Khasi wat ban shoh ban dat bad ruh haduh ban shim ïa ka jingim.
Ka KSU ka pynkynmaw biang sa shisien ïa kitei ki kynhun kwah lynti rel bad ïa ka sorkar jylla ïa kaei kaba la jia ha u snem 1989 bad kumjuh ha u snem 2017 ha kaba ka KSU bad ki paidbah ki ïakhun dohïap pyrshah ïa katei ka jingthmu ka sorkar ban wanrah lynti rel ha Byrnihat. Wat lada ka sorkar ka la pyndonkam da ka bor ban kem naphang ïa ki dkhot hynrei ka seng ka ïeng hi triang ban ïakhun tyngeh pyrshah ïa ka jingthmu wanrah lynti rel ha ka Bri U Hynñiewtrep.
Ka KSU ha ka kyrwoh ka la ong ba naduh mynshwa ka pynsngew sha ka sorkar ba tad haduh ynda la ïoh ki aiñ kiba khlaiñ ban tehlakam ïa ka jingbuhai shnong ki nongwei ha ka Bri U Hynñiewtrep kum ka ILP, ka MRSSA, ka Cut-off Year 25 tarik u Lber 1971 ban kheiñ nongshong shnong ba pura ka Meghalaya bad kiwei kiwei kan ym ailad horkit hordang ïa ka rel ba kan wan ksam lyngba sha ka Bri U Hynñiewtrep.
Ka KSU ka pynpaw ïa ka jingsngew lyngngoh haba ki mih ki briew lane ki kynhun kiba ong ba lada wanrah ïa ka ILP ha jylla, ki nongshong shnong ka jylla kin sa duk bad ïap thngan bad kumjuh ruh ka jylla kan sa hiar arsut ha ka roi ka par bad ka duk sohsat. Hynrei lada peit pat ïa ki jingshisha yn shem ba ki nongshong shnong ka Meghalaya ka bym don ILP ki duk haduh katta katta bad yn shem ruh ba ki briew kiba shong basah ha ki jylla ba don ILP kum ka Arunachal Pradesh, Mizoram bad Nagaland ki kham bit kham biang ban ïa ki nong Meghalaya ha kaba ka kamai kajih ka jong ki ka kham heh ban ïa ki nong Meghalaya. Lada ïanujor ïa ka Per Capita Income, yn shem ba ki nongshong shnong jong ki jylla ba don ILP ki kham heh ban ïa ki nongshong shnong ka Meghalaya ba khlem ILP.
Ka per capita income jong ki nong Mizoram ka dei 2,15,144 tyngka ha u snem 2022-2023, jong ki nong Arunachal Pradesh ka dei 1,99,992 tyngka ha u juh u snem bad jong ki nong Nagaland ka dei 1,45,537 tyngka. Katba ka per capita income jong ki nong Meghalaya ka kham rit ban ïa jong kitei haneng ha kaba ka poi tang 1,23,896 tyngka ha u snem 2022-2023. Kane ka pyni ba ka ILP kam dei ka aiñ ban pynduk ïa ki briew hynrei ka dei ka aiñ ban ïada ïa ki rit paid ha la ka jylla. Ka jingshisha lei ka paw shai ba ki briew ha Meghalaya ki dei kiba duk tam ha ka thaiñ shatei lammihngi ha kaba ka jingïoh jingkot ka jong ki ka shah tam kput ha ki briew ba sah ha ki jylla ba don ILP.
Lada kren ha ka liang ka lynti rel, KSU ka la ong ba ka Mizoram bad ka Manipur ruh kim don lynti rel hynrei sngew lyngngoh ba kham tad ki marbam ha kine ki ar jylla ban ha Meghalaya wat la ka Meghalaya ka jan lai shah na Guwahati lada ïanujor bad kitei ki jylla. Haba kumne yn kynnoh ïa ka jyngbym don lynti rel, ne ïa ka jingjngai na Guwahati ne ïa kito ki heh saipan kiba synshar bad rai ïa ka dor ka mur ki mar ki mata ha jylla jong ngi?
Ka per capita income ka Meghalaya lada ka kot kattei ruh hakhmat ka jinglong khatduh ha North East, hynrei katei ka per capita income kam long salonsar ïa baroh namar ha jylla Meghalaya, ka ïoh ka kot ka noh shilliang haduh katta katta, ha kaba ka spah ka tuid beit tang sha ki katto katne. Ïa kane lah ban sakhi lyngba ka NITI AAYOG ha kaba katkum ka kaiphod ha u snem 2023, ka jingbun paid ki BPL lane ki paidbah ba duk tasam ka dei ha Bihar kaba kot haduh 26% na baroh ki jylla ha India. Kaba sngewsih pat ka long ba ki briew kiba hab ha ka Below Poverty Line (BPL) jong ka India pat wan ba ar ka Meghalaya ha kaba haduh 25.46% na ka 100% ki nong Meghalaya ki imduk sohsat bad jynjar ha kaba kim ïoh ka jaka sah babiang, ka umdih babiang, ka pule puthi ba biang, ka bording elektrik ba biang bad ka bam kaba biang nalor kiwei kiwei.
“Hangne ruh phin shem ba ki BPL ki khambun ha Meghalaya ban ïa kito ki jylla ba don ILP kum ka Mizoram (ha kaba tang 3.72% ki hap kum ki BPL), Manipur (5.37%) bad Nagaland (11.75%). Ka jingbun BPL ha Meghalaya ka tam kput ruh wat ïa ka ri India (11.28%). Kumjuh ruh ki riew ïashah mynder ki ju ong ba ka ILP kan pynhiar ïa ka kam jngohkai pyrthei hynrei lada ïanujor bad ka jingwan ki tourist hapdeng ka jylla Meghalaya (bym don ILP) bad ka jylla Arunachal Pradesh (ba don ILP) yn shem ba ka duna bha ka jingïapher ha kaba ka jingïapher ka long tang kumba (20-30) hajar kaba pyni shai kdar ba ki tourists ki leit beit sha Arunachal Pradesh wat lada ka don ka ILP,” ong ka KSU.
Khatduh ka KSU ka kyntu ïa ka sorkar bad ka MTDF ba sangeh shwa ka phohsniew ïa kata ka High Speed Luxury Rail Network hynrei pynlut noh ban pynbor ïa ka sorkar India ban pyntreikam noh ïa ka ILP ha Meghalaya bad kumjuh ruh ban wad ki lad ki lynti kumno ban kyntiew ïa ka ïoh ka kot, ka pule ka puthi, ki surok ba bha, ki jaka ai jingsumar kiba paka, ka thungkam thungjam kaba khuid, ka jingteh lakam ïa u drok bad kiwei kiwei ki kam kyntiew namar ka jylla kam donkam tang kata ka ‘roi ka par’ ha kaba yn roi u nongwei bad par ki trai Ri hynrei ka donkam khamtam ïa ka ‘roi ka kiew’ ban roi ka Jaidbynriew bad kiew artet ka jylla, ong ka kyrwoh na u Bah Donald V Thabah General Secretary Khasi Students’ Union.
