Nongpoh, Jymmang 21: Kiba bun ki nongshong dukan harud ka surok 4-lane ha ka sorkar Nongpoh bad ki don ruh katto katne ki bynta kiba shah ktah ha shi lynter ka surok 4-lnae ki la kren bynniaw lypa bad ka daw ka long ba ka aiom slap ka la wan bad haba phai sha ki nala um pat ka NHAI haduh mynta kam pat lah ban pynheh ba kane ka ju wan rah ka jingshlei um ha ki bynta jong ka sor Nongpoh bad kiwei kiwei ki jak aba shah ktah.
Ki bynta kiba ju shah ktah bha ha ki snem ba la leit noh tang hapoh ka thaiñ jong ka sorkar Nongpoh ki kynthup ka ha centre gate Nongpoh, downgate, Pahamsyiem, Mawdiangum, Umlyngkdait bad ka daw ka jingshlei um ka dei hi na ka daw ka jingbym biang ki nala um hadien ka jingpynheh ïa ka surok 4-lane ha Ri Bhoi.
Kiwei kiwei ki bynta kiba ju shah ktah na ka jingshlei um ha ka por lyiur ki kynthup ha ki bynta jong ka shnong Umling, byrnihat bad ruh wat ha ka thain Jorobat bad ka thain Khanapara. La sakhi ba man la u snem ki nongshong dukan ki da kren bynniaw shisha bad ki pynpaw ruh ka jingeh ba tang shu jur u slap la thikna ban don beit ka jingshlei um bad haba la shlei um ki don kiba la hap ban khang ki dukan bad don ruh ba ha ka jingshlei um ka um ka la rung sha ki dukan bad ka la pynjot lut ïa ki jingdon jingem jong ki nongshong dukan.
Ïa kane la ka jingshah ktah ki nongshong dukan bad ki paidbah la sakhi man la u snem ha kaba na ka daw ka jingshlei um ka la wan rah ka jingduhnong kaba khraw bad bunsien ruh ka jingshah pynjot ha ka jingshlei um kim ju ioh jingïarap satia na ka sorkar.
Haba ïa kren halor kane ka jingeh, ha ki snem ba la leit noh la ju shim khia naduh ka bor district, ki MLA, ki bor shnong ban ïa kren bad ka NHAI, ba ka NHAI ka la ju kular ban weng ïa kine ki jingeh bad kumba long haduh kine ki sngi la sakhi ba ïa kane ka jingeh ki paidbah kiba ju shah ktah na ka jingshlei um la shu kut tang ha ka jingïakren ba ka NHAI kam pat lah ban leh ei ban pynheh noh ïa ki Nala Um.
Haba la ioh ban ïa kren bad katto katne ki nongshong dukan ha kitei ki jak aba shah ktah na ka jingshlei um, ki la pynpaw ba ki la bynniaw lypa tang shu poi ka por lyiur namar lada ka sorkar lane ki bor ba dei peit kim shim khia ïa kane ka bynta ban pynheh ïa ki nala um, khlem pep ka jingshlei kan wan ba ka Nala um jong ka surok 4-lane kam long kaba bit ba biang bad na ka daw ka jingrit palat ki nala um ka mih ka jingshlei um tang shu wan u lapbah, ki la pynpaw.
