Shillong, Jymmang 16 : Ka jingkieng Umshyrpi kaba la neh da ki snem mynta kala sdang rim shuh shuh bad sdang paw ki dak ki shin ka jingnang sator, sdang ban pei thliew ha ki katto katne ki bynta jong ka jingkieng kaban buh jingma ïa ki kali bad ki paidbah ba ïaid ba ïeng lyngba kane ka jingkieng.
Ka jingkieng Umshyrpi kadei ka jingkieng kaba ïaid kali baroh arphewsaw kynta naduh ki trok, bus, ki kali rit haduh ki ar shaka kiba wan na khap sor bad ki shnong na ki thaiñ nongkyndong ki hap ban ïaid lyngba ban wan ha nongbah Shillong. Hynrei kane ka jingkieng mynta kala sdang ban jot bad sakhi ruh ba wat ki nar rot kila mih shabar na ka jingshah khlong ha ka um.
Watla ka jingpyntrei ïa ka surok Shillong-Dawki ka dang ïaid shaid shaid hynrei la sngewthuh ba kane kan dang shim por ban pyndep, kumta ka donkam ba kane ka jingkieng kan dang neh bad kumjuh ruh ki bor sorkar badei khmih kin hap ban shimkhia ban baramot noh mardor khamtam ha kane ka aïom slap namar lada ym lah ban leh eiei kan sa nang jur ka jingjot jingpei thliew na ka jingbym biang wat ki nala pyllait um.
