Nongstoiñ, Nailur 12: Ka Federation of Khasi Jaiñtia & Garo People Mawthir unit, hadien ka jingujor ki paitbah nongshong shnong sha ka seng ïa ka jingsynjor jong ki lai tylli ki post lait ha ka shnong Mawthir, kiba la long jingma ïa ka ïaid ka ieng jong ki paitbah, kumta ka seng mynta ka sngi, ka la leit ban buh da ka jingthoh sha u Assistant Executive Engineer MePDCL Nongstoiñ Division West Khasi Hills ba un shimkhia lem ban bujli thymmai ïa kitei ki post lait ba la jot.
Ha ka jingkren jingkyrpad na ka seng, u Officer ba dei peit u la kular ba shen tang shu ai lad ka bneng bad lada ka rang, un sa phah ban kit noh ïa kitei ki post lait ban leit thung thymmai sha katei ka Shnong Mawthir.
Halor kane ka jingkular, na ka liang ka seng ka pynpaw ka jingkhublei ka ba kyrpang ïa u tei u Executive Engineer, ha kaba ka seng kan ïai ap khmih lynti ba utei u officer un pynurlong ïa kitei ki jingkular, na ka bynta ka jingbha jong u paitbah nongshong shnong jong ka thaiñ, ong u Bah Skalanboksis Paliar President FKJGP Mawthir unit bad Kiewdonbok Ramri General secretary FKJGP Mawthir unit.
