Nongpoh, Naiwieng 27: Kiba bun ki paidbah nongshong shnong ba hap hapoh ka Raid Madan Kyrdem ha Ri Bhoi District ki la pynpaw ïa ka jingangnud ban ioh noh da ka surok kaba thymmai na Bhoirymbong sha Kyrdem, kaba dei halor ka nongrim ba ka jingsniew palat ka surok ka la ktah shisha ïa ki paidbah ha ka leit ka wan.
Haba kren halor ka jingsniew ka surok, kane ka la ktah shisha ïa ki paidbah nongleit nongwan kiba pyndonkam ïa katei ka surok bad lyngba katei ka surok da ki phew tylli ki shnong ki pyndonkam ha ka leit lyngba jong kane ka surok.
Ki shnong kiba la pyndonkam ïa kane ka surok ki kynthup naduh ki shnong na ka thaiñ Khyndewso shaduh Kyrdem, ki thain Klew, thaiñ Mawbsein bad ter ter shaduh sha Bhoirymbong. Ka jinglong jingman kane ka surok kumba long haduh mynta ka la buh jingeh ïaki paidbah ha ka leit ka wan, ha kaba mynta la bun bun phew snem kane ka surok ka la jot rathai bad la jynjar ha ka leit ka wan.
Kaba kham sngewkhia ka long ba bun kiba pang ba shitom, ki longkmie kiba armet bad wat ki khynnah skul ki pyndonkam ïa kane ka surok bad teng teng haba ïaid ba ieng ki paidbah kaei kaba mih na ka shyntur jongki, ka long ba ki sngewlong khunswet bad sngew shah ibeiñ namar ka jingbym phai khmat ka sorkar ban pynbha ïa kane ka surok.
Haba phai sha ka jinglong jingman kane ka surok, lah ban ong naduh ki tymmen ki kro, ki longkmie ki longkpa bad ki samla ne ki heprit ki da don shisha kata ka jingangnud ba ka sorkar kan phai khmat lem noh ban thaw ki lad ki lynti na ka bynta ban siang rong ïa katei ka surok, bad lajin ba ka sorkar ka kloi ban phai khmat ban pynioh syndon da ka surok kaba thymmai ka long shisha ka jingkyrkhu ïa ki paidbah katei ka thaiñ ban pyndonkam ïa kane ka surok ha ka leit ka wan.
