Aiti ki nongïalam bad ki nongkyrshan ha u Bah Paul ban shim ka rai ba khatduh
Ban shim ka rai halor ka saiñ pyrthei
Shillong, Risaw 16: U nongialam ba rangbah jong ka UDP uba dei ruh u MLA ka West Shillong u Bah Paul Lyngdoh u la ong ba u la ioh ïa ki jingtyrwa na baroh ar tylli ki ktem kata jong ka Bharatiya Janata Party (BJP) bad National People’s Party (NPP), katba ki nongialam ka constituency jong u ki la ieh ha u ïa ka rai ba khatduh halor ka lawei sain pyrthei jong u.
“Ki la don ki nongtyrwa na baroh ar tylli ki kynhun.Nga dang bishar bniah bha ïa kawei pa kawei na kita”, la ong u bah Lyngdoh ha ki nongthoh khubor haba kylli hato un leit iasoh bad ka BJP ne ka NPP.
U la ong ba ki nongkyrshan jong u ha baroh ki kyrdan ki kwah ba un shim ïa ka rai kaba khatduh.
“Nga la don ka jingïakren bad ki nongïalam jong ka constituency bad uwei pa uwei na ki u la ong ba katba ki dang ai jingmut, kin iehnoh ïa ka rai ba khatduh ha nga bad kin burom ïa kano kano ka rai namar baroh shilynter ki ju jied ïa u Bah Paul kum u nongïalam jong ki ym kum u dkhot jong kano kano ka seng saiñpyrthei,” u la ong.
Related Posts
Hynrei u Bah Lyngdoh u la ong ba ka sienjam kaba hadien jong u bad ka lawei jong ka UDP kan shong ha ka rai jong u Lamphang halor ka jingujor pyrshah ïa ki 8 ngut ki MLA barim jong ka UDP kiba la pynïasoh sha ka BJP.
“Kaba bun kan shong ha ka rai kaba u Lamphang un ai katkum ka jingujor ba la ai da ka UDP.Kumba u Lamphang u la ïasam ar sngi mynshwa, u dang bishar bniah ïa kane ka kam.Ha ka shisngi ne ar sngi, ngi khmih lynti ban tip ïa ka rai jong u Lamphang, katkum kaba ngi lah ban sngewthuh ïa ka lynti ban ïaid shakhmat,” u la ong.
U la kdew ba ki 8 ngut ki MLA ki la pan jingithuh kum ki dkhot ka BJP hapoh ka Tenth Schedule hadien ba ki la mih noh na ka UDP.
“Ki don shibun kiei kiei kiba hap ban shim khia.Da kaba pynshong nongrim ha ka hukum kaba hadien kaba yn sa pynmih da u Lamphang, nangta ngan sa tip kaei ka nongrim kaba khatduh, kumno kiei kiei ki ieng bad nangta ngan sa shim ïa ka rai kaba khatduh”, u la bynrap.
Haba kylli hato u la kyntait ïa ka Congress bad ka KHNAM, u bah Lyngdoh u la ong, “Ngam shym la kyntait eiei.”