Nongpoh, Jymmang, 02: U Dr. Ricky A.J. Syngkon, Member of Parliament, ka Shillong Parliamentary Constituency, mynta ka sngi u la leit ban plie paidbah ïa ki 2 tylli ki kamra klas jong ka skul Sunrise Adventist Secondary School, kaba don ha Lumparien Khyndewso kaba la tei haka jinglut kumba 9.81 lakh.
Kum ban pyntip paidbah, kitei ki 2 tylli ki kamra klas kiba la pynieng ha katei ka skul, ka dei da ka jingsynñiang ka seng Hills Farmers Union, Sengkmie bad ka World View Impact, India, kiba dei ki seng treimon sngewbha ha ka jylla.
Ha kane ka sngi ba la plie ïa kine ki kamra Klas la sakhi lang da ka jingdon lang u MDC ka Mawhati, u Bah Kynjohlang Rangtong, u Bah Isynei Hinge MDC ka Umroi, u Bah Commander Shangpliang, President ka Hills Farmers Union, u Bah Alfonbirth Kharsyntiew, General Secretary, ka kong Ibadap-hunshisha Blah, kaba dei ka Managing Director ka World View Impact, ki nonghikai, ki khynnah skul bad ki nongshong shnong ka thaiñ Khyndewso.
U Dr Ricky AJ Syngkon u la ong ba ka pule ka puthi ka dei ka atiar kaba ngi lah ban pyndonkam ha kano kano ka por, bad ka dei ka ïa kaba ngi donkam shisha, namar ha kiba bun ki khep tang na kadaw ka jingduna ka jingnang jingstad bun ki briew ki shah ñion beiñ bad pynpaw ka jingsngewnguh ïa ka HFU bad ka World View Impact kaba la shim ïa ka sienjam ban kyntiew ïa ka pule ka puthi sha ki thaiñ khappud.
U la ong ruh ba lyngba kitei ki kamra klas kin long shisha ka jingkyrkhu ïa ki khynnah kiba leit ban wad jingstad ha katei ka skul ban long ruh ka kamra kaba ai jingkyrmen ïa ka lawei jong ki khynnah.
