Aiti ka HC sha ka CBI ban tohkit ia ka kam tih bad khaii dewiong beain ha ka jylla
Phla ki nongmudui ba shah byrngem ha ki nongkhaïi
Shillong, Naitung 04: Ka Division Bench jong ka ïingbishar ka Meghalaya mynta ka sngi, ka la ong ba kan long kaba bha na ka bynta ka jingbit jingbiang lang baroh ban aiti noh sha ka CBI ban tohkit halor ka jingbteng ka kam tih bad khaïi dewïong beaiñ ha ka jylla.
Kane ka hukum jong ka ïingbishar kaba kynthup ïa u Chief Justice Sanjib Banerjee bad u Justice W. Diengdoh, ka la ong, “Hadien 15 bnai ka jingshim bishar halor kane ka kam tih dewïong bad khaïi dewïong beaiñ, ka kam kam shym la poi shano shano bad kan long kaba bha ban aiti noh sha ka CBI ban tohkit ban lap ïa ki jingshisha”.
Ka hukum ba la pynmih mynta ka sngi, ka la ïathuh ruh ba u nongujor, u la wanrah ban pynshisha ruh da ki Video bad ki dur. Ha ki video ba la pyni hapoh ïingbishar, la lap ka jingtih dewïong kaba dang thymmai bad kumjuh ruh ïa u dewïong ba la lum thup. Ha ka bynta kaba ar bala pyni da ki dur, la lap ïa ka ki jaka tih dewïong ha kylleng kylleng kiba dang tih thymmai kynthup ruh ïa u dewïong uba la lum thup thymmai.
“Kine ki video bad ki dur ki long ka jingpynshisha ba ka jingtih dewïong bad ka jingkhaïi dewïong ka dang ïaid ha jylla Meghalaya, wat hadien ka jingkhang jong ka NGT naduh u snem 2016 bad ka jingbthah ka Supreme Court naduh u 2016, 2017 ter ter”, la ong ka ïingbishar.
Ha kane ka jingshim bishar mynta ka sngi, la wanrah ruh sha ka jingtip jong ka ïingbishar ba ki nongujor ki la shah byrngem ha ki briew ne u briew uba donkti bha ha ka kam khaïi dewïong beaiñ. Na ka liang ka ïingbishar ka la bthah ïa kine kiba shah byrngem ban wanrah da ka affidavit ha ka 6 tarik mynta u bnai.
Ka Division Bench ka la ther biang sa shisien ïa ki bor sorkar bad ki bor Pulit halor kane ka jingbym lah ban teh lakam ïa ka jingkhaïi dewïong beaiñ, da kaba ong ba kine baroh kin nym jia khlem ka jingïatip lang ki bor synshar bad ka jingkheiñ sting ki bor Pulit.
Na ka liang ka ïingbishar ka la kynthah ruh sa shisien ïa ka jingtreikam ki karkhana saiñ dewïong ne ki coke factory kiba la shu mih kumba mih ki tit khlem da ïoh kano kano ka jingbit kaba biang na ki bor sorkar.