Ailad u CM ïa u Sirdar Laitkroh ban long kongsan ban plie ïa ka ophis Block ha Laitkroh

Shillong, Jylliew 23 : U Sirdar ka Elaka Laitkroh, Bah Pailastar Kharkongor u la ïoh ban long kum u Kongsan ha ka jingplie ïa ka ophis treikam ba dang shu dep shna thymmai jong ka Khatarshnong Laitkroh C&RD Block hadien ba u Myntri Rangbah ka Jylla, Conrad K Sangma u la ailad kyrpang ïa u ha ryngkat ka jingdonlang u MLA ka Sohra, Bah Gavin Mylliem bad kumjuh u MLA ka Mawphlang, Bah Beyondstar Kurbah.
Haba kren ha kane ka jingïalang kaba lyngkot, u Myntri Rangbah u la ong ba ka jingïatrei ryngkat ryngkat bad ki khlieh nongsynshar kadei ka bynta kaba hakhmat eh jong ka sorkar na ka bynta ban wanrah ai ka roi ka pa.
“Ka jingplie paidbah da ki Khlieh Nongsynshar kum ki Sirdar ïa ki jaka treikam jong ka sorkar ka pyni shai kdar ai ka jingangnud jong ka sorkar ban wanrah bad pynjan shuh shuh ïa ka jingtreikam jong ka sorkar bad ki paidbah nalor ba ka wanrah ruh ïa ka jingkitkhlieh bad ka jingsngewtrai,” u la ong.
Nangta u ong ruh ba kane ka ophis treikam ba thymmai ba tip kum ka Block Integrated Development Complex ka dei shi bynta jongka jingthrang jong ka sorkar ban pynbha shuh shuh ïa ki jaka treikam jong ki Block ha baroh 46 tylli kynthup lang ïa ki 10 tylli ki Block kiba dang shu plie thymmai.
U Myntri Rangbah u la pynpaw ruh ba ki paidbah kim dei ban long tang ki nongpeit kai hynrei ba kin snohkti lang ha ka jingwanrah ïa ka roi ka pa ha ki shnong ki thaw.
Ha kane ka sngi la donlang ruh naduh ki heh sorkar ka jylla, nangta ka Deputy Commissioner ka East Khasi Hills, Kong RM Kurbah, SDO Sohra, BDO, ki heh pulit bad ki paidbah nongshong shnong.