Watla ka jingïapynbeit ïa u pud u sam hapdeng ka Sorkar Meghalaya bad ka Sorkar Assam ka dang sahteng haduh mynta hynrei ka Assam ka la nang ïai klun ïa ki jaka ki puta jong ka jylla Meghalaya kiba don ha khappud khamtam ïa ki shnong kiba dang hap hapoh ka Raid Nongtung, Ribhoi District.
Ka jingpyni bor jong ka Assam, naduh ba ladep ïasoi ïa ka Memorandum of Understanding hapdeng u Myntri Rangbah ka Jylla Meghalaya u Conrad K. Sangma bad u Myntri Rangbah ka Jylla Assam u Himanta Biswa Sarma, ka la nang jubor arshah. Ka jingkyntur pud jong ka Assam sha ki shnong ba dang rep bad shong shnong da ki Khasi ha ka Raid Nongtung ka long da kaba wanrah ïa ki kam pynroi khnang ban pynbiej ïa ki nongshong shnong ka Jylla Meghalaya kiba shong basah ha khappud ba kin ngop ha ki jingriam ka Sorkar Assam. Hynrei wat hapdeng ka jingpyrshah jong ki paidbah kiba shong basah ha khappud, pynban ki bor synshar ka Ribhoi District ki shu long tang ki nongpeit kai namarba kim nud satia ban saham eiei ruh em ïa ki bor synshar district ka jylla Assam kiba theh ïa ki kam pynroi ha ki shnong khappud katba ka jingthmu kaba sha lyndet ka long beit ban ïoh klun jubor ïa kine ki shnong kiba hap hapoh ka Raid Nongtung.
Ka Raid Nongtung ka dei kaba la shah ktah bha ha kane ka jingïapynbeit pud jong ka Sorkar Meghalaya bad ka Sorkar Assam. Wat ki paidbah nongshong shnong ruh kim ïahap satia ïa kane ka rukom ïapynbeit pud hapdeng kine ki ar tylli ki jylla namarba ki ar tylli ki Sorkar kim shym la sngap satia ïa ka sur jong ki paidbah hynrei ki paidbah ki kynnoh ba ki la shah thom da ka bor pyrshah ïa ka mon jong ki ban shah khynñiat sha Assam.
Ki paidbah kiba shong basah ka shnong Madan Umwang, ki ju sakhi bun ki jingjia naba ka Sorkar Meghalaya kam nud satia ban pynsangeh ïa ki jingleh donbor jong ka Sorkar Assam ïa ka mon jong u paidbah nongshong shnong.
Dang ha u snem, 2017, ka Sorkar Meghalaya ka la pyntreikam ïa ka skhim sam bording ha ka shnong Sabuda pynban ka Sorkar Assam ka la pyrshah beit pylleiñ pylleiñ kat haduh ba kane ka skhim sam bording jong ka Sorkar Meghalaya ha kane ka shnong ka la shu sahkut bad sepei bad naduh katei hi ka por haduh mynnta mynne la pynsangeh syndon kane ka jingthmu ban pynpoi bording ha ka shnong Sabuda namarba ka Sorkar Assam ruh ka kam nongkynti ïa ka jinglong trai halor kane ka shnong.
Ka jingtlot jong ka Sorkar Meghalaya ka la nang paw pylleiñ pylleiñ haba kam nud satia ban saham wat tang shi kyntien ruh haba ka Sorkar Assam ka la wanrah ïa kino kino ki kam pynroi ha ki shnong kiba don ha khappud. Ka Sorkra Assam ka pyntrei beit da ka suk khlem kano kano ka jingshah pynthut ha ki bor synshar ka Jyla Meghalaya. Kane ka dei ka jingïohlad jong ka Sorkar Assam ban pyntrei beit ïa ka skhim sam bording ha shnong Madan Umwang ha kaba la sakhi ba la pynieng ïa ki post electrict ha lynter ka surok jong kane ka shnong.
Katkum ka jingïakut ha ka jingïakren hapdeng ka Sorkar Assam bad ka Sorkar Meghalaya ka long beit ban pynneh ïa ka Status Quo ha ki snem kiba ladep bad ban ym pynthud ïa kino kino ki kam pynroi lada wanrah na baroh ar liang. Hynrei kine ki jingïakren ki shu kut tang ha ka miej dihsha hapdeng ki arngut ki Myntri Rangbah katba ki jingshisha pat kim long kumta naba ka Sorkar Assam ka pynkheiñ pylleiñ pylleiñ ïa kane ka jingïakut.
La sakhi ruh haduh mynta ba dei tang ka Assam kaba ïohlad ban shna ïa ki surok, ka mini stadium, ki ing skul, ki dorbar hall, ki surok, ka jingpynpur ïa ka bording bad kiwei kiwei ki kam pynroi sha ki shnong kiba dang hap hapoh ki Hima jong ka Jylla Meghalaya. Kane ka jingleh jong ka Sorkar Assam ka ju pyningkhong haduh katta katta ïa ki paidbah nongshong shnong kiba sah ha ki shnong khappud namar ka jingshah jem bad ka jingaili shaba palat jong ka Sorkar Meghalaya.
Ka jingong jong u Myntri Rangbah ka Jylla Meghalaya u Conrad Kongkal Sangma bad u Symbud Myntri Rangbah u Bah Prestone Tynsong ba lada shu pyrshah beit ïa ka jingïapynbeit pud wat hadien shispah snem ruh yn ym pat lah satia ban ïapynbeit ïa pud u sam, ka long kaei kaei kaba sngew thamula bha namar katkum ka jingphla jong ki paidbah kiba sah ha ki shnong khappud kiba shah ktah na ka jingïapynbeit pud ka long ba ka Sorkar Meghalaya bad ka Sorkar Assam kim shym la burom satia ïa ka sur jong u paidbah hynrei la shu ïaid lait khlem ka jingmynjur jong ki trai khyndew, ki dorbar shnong, ki khlieh nongsynshar jong ki Raid bad ki Hima bad ka jingieh sharud ïa ka Khasi Hills Autonomous District Council kaba long ka nongri nongsumar ïa ka khyndew ka shyiap ha kane ka jylla Meghalaya.
