Ai nuksa u bah Sniaw ba lada phi kam ïa ka lok jong kiwei kumno phin sngew

Shillong, Risaw 8: U Bah Sniawbhalang Dhar uba dei u Symbud Myntri Rangbah ka Jylla bad National Vice President ka NPP mynta ka sngi Palei, ula kyntait ïa ki jingkynnoh ba bun ngut ki MLA ka NPP kynthup kiba na Garo Hills, ki thmu ban pynïasoh noh bad ka BJP.
Haba kynthoh tyngeh ïa ka jingkam u Nongialam ka BJP u Bah A L Hek, u Bah Sniawbhalang Dhar ula ong, ba ka NPP ka iengtylli kawei bad kum kitei ki jingkam kin dei kiba shu shah khein kam kai ha ki paitbah.
“Kam don kano kano ka jingiapher namar baroh ki seng sain pyrthei ki kwah ban pynkhlain ialade.Ban shu kam ka long kaba suk hynrei ban shim ïa ki, kin ym lah” ong u Bah Dhar.
Haba kynthoh ïa ka BJP, ula ong, “Lada phi kam jubor, phin shah rkhie bein ha ki paitbah.Nuksa, lada phi kam ïa ka lok jong kiwei, kumno phin sngew.Ngam kwah ban kren eiei halor kiwei pat ki seng”.
U Bah Dhar ula banjur ba kam don kano kano ka jingiapher jingmut hapoh jong ka NPP.
“Ka NPP kadei ka seng kaba ïatylli.Ka jingkam u Bah Hek ba ki don katne ki (MLA), ngam tip eiei.Ngi kum ka NPP bad ki 33 ngut ki MLA, ngi long kiba ïatylli pura” ula ong.
U Bah Hek dang shen ula kam ba katto katne ki MLA ka NPP khamtam na Garo Hills, kila ïakren bad ka BJP bad pynpaw ïa ka jingkloi ban pyniasoh bad ka seng hashwa ka elekshon MLA ha u snem 2028.