Ai mynsiem u Samla Jason ïa ki Nongïalam Seng Samla Raid Nongbri ban trei ha ka imlang ka sahlang

Nongpoh, Kyllalyngkot 18: Haba kren kum u kongsan ha kawei na ka jingïalang ba la pynlong da ka Seng Samla Raid Nongbri kaba la pynhap pyrda noh ïa ka lympung ïalehkai phutbol kaba la long mynta ka sngi ha Umsawnongbri, u Samla Jason Lennox Nongrum, uba dei uwei na u khun samla ka dong Ri Bhoi bad u President ka HYC Ri Bhoi u la ai mynsiem ïa ki nongïalam ka Seng Samla Raid Nongbri ba ki dang dei ban bteng ban shakri na ka bynta ka bha ka miat ha ka imlang ka sahlang kaba hap ha ki shnong hapoh ka Raid Nongbri.
Kawei na ka bynta kaba u la kham ban khia ïa ki nongïalam ka Seng Samla Raid Nongbri ba kum ki samla ki dei ban phai khmat kyrpang na ka bynta ban peit ïa ka bha ka miat ki khun samla katei ka Raid Nongbri.
Ha kane ka juk ba mynta kaba ngi hap ban mad shibun ki jingtynjuh kiba bun ki khun samla ki don hapdeng ka jingduh jingkyrmen bad lad don kiba ai mynsiem bad pynshlur kum ki khun samla kin lah ban ieng ha la ki jong ki kjat na ka ban leh ïa shibun ki kam kiba ai jingmyntoi ha ka imlang ka sahlang bad ym ki kam kiba pyntriem ïa ka imlang ka sahlang, ong u Samla Jason Lennox Nongrum.
U la ong ruh ym lah ban len kiba bun ki khun samla ki don ïa ki sap ki phong bapher bapher ba la ai kyrpang da u Blei bad lada ym don pat kita kiba ai mysiem bad pynshlur kin shah ïalam bakla noh ïa ka jingim ha kane ka juk ïa beh rongphong jong ka pyrthei.
U Samla Jason Lennox Nongrum kum u samla Nongïalam ha Ri Bhoi, u la ong ruh ba u don kata ka jingangnud ba ki khun samla ki dei ban long kita ki iktiar ki ban trei na ka bynta ka bha ka miat bad ban kyntiew ïa ka imlang ksa hlang ha baroh ki liang bad kum ki samla lada kim don kata ka jingkitkhlieh ban trei ïa ka imlang ka sahlang ka dong bad ka thaiñ kan nym lah ba kiew shaphrang ha baroh ki liang.
Haba ai mynsiem ïa ki nongïalam ka Seng Samla Raid Nongbri ban long kita ki nongïalam kiba don shisha ka kyrdan nongïalam, u Samla Nongrum u la ban khia ruh ba ki samla kim dei ban long kita ki samla kiba kam ba ki dei ki nongïalam khlem da leh ïa ka kam bad lada ki samla hi ki don kata ka jingkitkhlieh ki dei ban trei borbah na ka bynta ban pynduh jaid ïa ki kam sniew kam smeh bad ba long kita ki samla ban wan rah ïa ka jingkylla ha baroh ki liang hapoh ka imlang ka sahlang, u la bynrap.
Shuh shuh, u la kham ban khia ruh ïa ki nongïalam ba ki dei ban kham phai khmat kyrpang na ka bynta ban sei ïa ki sap ki phong ki khun samla la ka long ha ka jingïalehkai sport, ha ka pule ka puthi bad ha kiwei kiwei ki kam, namar lada lah ban sei kum kita ki khun samla na katei ka dong bad ka thaiñ kin wan shibun ki jingkylla ha ka imlang ka sahlang kaba long ka nam bad ka burom jong katei ka thaiñ hapoh ka Raid Nongbri, u la bynrap shuh shuh.