Ai mynsiem u MLA ïa ki longkpa Katholik ban rat dyngkhong ïa u drok nalor kiwei ki kam sniew ha ka imlang sahlang

Nongpoh, Risaw 24: Haba leit shim bynta kum u kongsan ha ka Cultural Prokram ka Lympung ba Hynñiew ka Synjuk ki Seng Rangbah Katholik, Zone-VI jong ka Shillong Archdiocese kaba la pynkut noh hynnin ka snig u Blei ha St. Mary’s Secondary School, Nongkhrah, u MLA ka Nongpoh Constituency, u Bah Mayral Born Syiem u la ban khia jur ïa ki Longkpa ba ki dei ban don ka jingkitkhlieh ban ïa trei lang na ka bynta ban pynduhjaid ïa u drok bad kiwei ki jingdih ba sniew ba la pynjot ïa kiba bun ki khun samla ba lui lui jong ki Longïing Longsem hapoh ka District bad ha ka jylla hi baroh kawei.
“Ka long kaba donkam bha ban don kum kane ka lympung ka jingïakynduh lang ki Longkpa na ka bynta ban ïa phylliew jingmut bad ban saiñdur ym tang na ka bynta ban pynkhlaiñ ïa ka Balang ha ka jingim ba kynja mynsiem, hynrei donkam ruh ba ki Longkpa kin don ka jingkitkhlieh ha la ïing la sem bad ha ka imlang ka sahlang ban ïa trei ryngkat na ka bynta ban ïakhun ïa shibun ki kam sniew kiba la ktah ïa ka imlang ka sahlang bad khamtam ka jingkynrei u drok ka la buh jingma ïa ki khun samla lada ngim don kata ka jingïatrei lang na baroh ki liang” ong u Bah Mayral Born Syiem, MLA ka Nongpoh Constituency.
U la ong ruh nalor ba ngi donkam ban pynkhlaiñ ïa ka jingim ba kynja mynsiem na ka bynta ka kam ka jong u Blei bad kum ki Longkpa ki hap ruh ban don lang kata ka jingkitkhlieh ïa ki khun ki kti bad ïa ka imlang ka sahlang ban ïa trei ryngkat ban pynduhjaid ïa shibun ki jingsniew kiba ap ïa ki khun samla. Kawei na ka jingma kaba ap ïa ka jaid bynriew bad ka jinglot ka Balang, ka dei ka jingkynrei u drok ha kaba lada ngim ïa trei lang une u drok un pynjot ym tang ïa ka jingim ba kynja mynsiem bad u pynjot lut naphang ïa ka ïing ka sem bad ka imlang ka sahlang, ha kaba la sakhi ba bun ki khun samla ki la ngop ha une u jingdih ba sniew ba kum ki Longkpa ruh ki don ka bynta kaba khraw ban peitngor ïa la ki khun ki kti khnang ba ki khun kin lait na ki tyrsim ba shyrkhei jong u drok.
U la kyntu ruh ïa ki Longkpa Katholik na ki saw tylli ki Parish kata na ka Umden, Nongpoh, Byrnihat bad Umkadhor Parish ba lyngba kane ka lympung ba ki la wan ban shim bynta, kiei ki jingtip ne ki jingmyntoi ba ki la ioh lum na kane ka lympung kin leit phai sha la ing la sem ban hikai pat ïa kiwei ba ki hap ban tip ïa kata ka kyrdan longkpa bad ruh ban don lang kata ka jingkitkhlieh naduh na ïing, ha ka Balang bad wat ha ka imlang ka sahlang.
Shuh shuh, u la bynrap ruh ba kum u Nongmihkhmat paidbah u angnud ruh ban yn don ka jingïa trei lang la ka long ha ka kam Balang, ha ka imlang ka sahlang bad lada don kata ka jingïatrei lang na baroh ki liang ngi lah ban wan rah ïa ka jingkylla la ka long hapoh ka Balang, ka imlang ka sahlang bad ruh kin khlaiñ ki Longïing longsem bad haba khlaiñ ki Longïing longsem kan khlaiñ ruh ka Balang bad ka jaid bynriew, u la bynrap.