Jowai, Risaw 03 : Ka Rotary Club Jowai kawei na ki kynhun treimon sngewbha ban synñiang ïa ki kam babha hapoh ka imlang ka sahlang, ha kane ka 01 tarik u Risaw kala pynlong ïa ka prokram pynkup burom ‘Appreciation & Recognition Award’ ïaka tnad ka koit ka khiah kumjuh ïa ka Home Guard & Civil Defense Department, jong ka West Jaiñtia Hills kiba la trei shitom ban tehlakam na jingsaphriang ka jingpang Covid 19 ha kine ki ar snem ba la dep.
Ïa kane ka jingpynkup burom la pynlong ha Infinity Conference Hall, Mooralong ha ka jingdonlang u Dr. P.Nongtdu, Principal Jaiñtia Eastern College, Khliehriat uba long kum u kongsan, ka Rtn. Easter F. Gatphoh (MPHF), Charter President RC-Jowai, u Rtn. Mewothi Gatphoh, Rtn. D.F.Majaw (PHF) Director Club Service RC-Jowai, Rtn. Montri Passah, Immediate Past President RC-Jowai, Rtn. Rudolf E.Laloo (PHF) RC-Jowai, Rtn. Dr. Kamwadae Syngkon, Secretary RC-Jowai 2022-23 wa u Rtn. Rueveny Nongtdu.
Katba ïa ka jingïalang ha katei ka sngi la pynïaid da u Rtn. Samehi Laloo, (RFSM) President RC-Jowai ka jingkren pdiang da u Rtn. J.M. Pohsngap, Past President RC-Jowai.
Nalor ka jingpynkup burom ïa ka tnad ka koit ka khiah bad ka Home Guard & Civil Defense kala don ruh ka jingleh burom ba kyrpang ïa u Dr. Pohsnem, Medical & Health Officer DMHO, In charge Nartiang PHC, ka Dr. H. Uriah, Medical & Health Officer DMHO, West Jaiñtia Hills bad kawei ka Lab Technician.
Na ka liang ka Rotary Club Jowai kala pynpaw ka jingsngewkmen halor ka jingkiew kyrdan jong u Rtn. Yoo Franky Laloo kam u Executive Engineer MSPCB, Shillong ha ka juh ka por la pynkup burom kumjuh ïa u.
U Rtn S.K. Lato, (PHF) Director of Community Service RC-Jowai haba ai jingkren ula pynsngew ïa ka jingïaid lynti ha ka kam shakri jong ka Rotary International da kaba ong ruh ba ka Rotary ka trei halor ki lai tylli ki ‘H’ kata kaba mut Health, Hunger, Humanity. Ha ka juh ka por ula ong kum ki dkhot jong ka ki dei ban trei ruh halor ki lai tylli ki ‘O’ kaba mut open mind, open hearth, open hand.
Na ka liang u kongsan u Dr. P. Nongtdu ula ai ka jingïaroh ïa ka Rotary Club Jowai kaba long kum kawei na ki seng kaba ai ka jingshakri ïa ka bha ka miat ha ka imlang ka sahlang, ula ai mynsiem kumjuh ïa baroh kiba la shah pynkum burom.
Shuh shuh u Dr. Nongtdu u kyntu ïa ka Rotary Club Jowai ba kan sdang noh ïa ka jingtreikam jong ka hapoh ka East Jaiñtia Hills na ka bynta ban ai ka jingshakri kaba bha tam ïa ka shnong ka thaw.
