Ai khusnam ka NPP Jirang Block ïa ki samla pule bad ïa u nongshna phlim ha ka lyngkhuh sngikha u P.A Sangma

Nongpoh, Nailur, 01: Kum shi bynta ban rakhe ïa ka jingdap 11 snem ka party NPP naduh ba la seng ïa ka ha u snem 2013 bad ruh ban kynmaw burom ïa ka lyngkhuh sngi kha ba 76 snem u (L) Purno Agitok Sangma kum u nongseng ïa kane ka party, ka NPP Jirang Block ryngkat ka jingïatrei lang bad ka NPP Ri Bhoi District mytna ka sngi ka la rakhe ïa kane ka sngi da kaba sam ïa ki khusnam sha ki samla pule ba pass bha ha ka SSLC examination 2023 bad ruh ka jingsam khusnam sha uwei u khlur nongshna phlim ba la ioh khusnam ha ka rib ba la tip kum ka National Film Award.
Ïa kane ka jingrakhe la pynlong ha Don Bosco Higher Secondary School Byrnihat ha kaba ka Dr. Ampareen Lyngdoh, myntri ba dei peit ïa ka tnad ka koit ka khiah bad kaba peit ruh ïa ka tnad jong ka aiñ ka Kanun (Law) ka la wan ban shim bynta kum ka kongsan bad u MLA ka Jirang Constituency, u Bah Sosthenes Sohtun kum u symbut kongsan.
La sakhi lang ruh ha kane ka sngi da ka jingdon lang u MLA ka Umroi, u Bah Damanbait Lamare, u MDC ka Jirang, u Bah Victor Rani, u president ka NPP Ri Bhoi, u babu Clement Mawlong, u President ka NPYF Ri Bhoi, u Bah Pyndaplang Wahlang, u Parish Priest ka Byrnihat Parish, u Fr. Anil Joseph, ki nonghikai, ki khynnah skul bad kynthup ruh kiwei kiwei ki nongïalam ka party bad ki longkmie ki longkpa jong ki samla pule.
Ha kane ka sngi, na ka liang ka myntri sorkar, ka Kong Ampareen Lyngdoh ryngkat ka jingdon lang kitei ki MLA bad MDC ki la leh burom ruh ïa u Purno Agitok Sangma da kaba buh syntiew kum ka jingburom ïa une u nongïalam uba la seng ïa kane ka party da ka jingthmu ban shakri ïa ka bha ka miat bad ka roi ka par ki paidbah hapoh ka jylla.
Lyngba jong kane ka sngi, ka NPP Jirang Block ka la pynkup burom ruh ïa ki samla pule kiba la pas bha ha ka SSLC examination bad kynthup ruh ïa ka jingpynkup burom ïa uwei u khlur nongshna phlim, u Dominc Sangma, uba la ioh ïa ka khusnam National Film maker Award.
Na ka liang u MLA ka Jirang Constituency, u Bah Sosthenes Sohtun u la kren ha kane ka sngi bad kum u nongïalam paidbah na Jirang Constituency u la ai khublei kyrpang ïa baroh ki nongïalam ka party kiba la shim khia ban leh burom ïa kane ka jingdap 76 snem jong ka jingkha ïa u Purno Agitok Sangma kum u Myntri barim ka jylla bad uba la bat ruh ïa ka kyrdan kum u Speaker ha Lok Sabha.
U la ai khublei ruh ïa baroh ki nongïalam bad ki dkhot ka NPP ba dei lyngba ka jingïatrei lang la lah ban rakhe ruh ïa kane ka jingdap 11 snem ka NPP party, kaba dei kawei na ka party kaba don ïa ka thong ban shakri na ka bynta ban kyntiew ïa ka jylla ha baroh ki liang.
Kum u MLA paidbah, u Bah Sosthenes Sohtun u la ai mynsiem ruh ïa ki samla pule bad kumjuh ruh ïa utei u khlur nongshna phlim na ka jylla Meghalaya ba kin dang trei shitom ha ka sap ba la ai kyrpang da u Blei bad ka jingangnud jongu, ka long ban dang mih shubun ki khlur kiba long kita kiba tynshaiñ na ka bynta ka bha ka miat bad ka roi ka par ha ka jylla hi baroh kawei.
Ka Dr. Ampareen Lyngdoh haba kren ha kane ka sngi ka la pynpaw ïa ka jingkmen ba ka party NPP ka la lah ban kynmaw burom ïa kane ka jingdap 76 snem u Purno Agitok Sangma uba la seng ruh ka party NPP kaba la ïaid lynti la 11 snem bad ka jingdon kane ka party hapoh ka jylla ka long ruh kawei ka jingmyntoi ïa ki paidbah namar ka thong jong ka party ka long ban trei borbah na ka bynta ki jingdonkam ki paidbah hapoh ka jylla.
Ka la pynshai ruh sha ki paidbah ba ka daw kaba la pynlong ïa ka ban ïa soh sha ka NPP party, ka dei ruh halor ka nongrim ba kane ka party ka don ïa kata ka thong kaba kham bha ban trei na ka bynta ban kyntiew ïa ka jylla bad dei namar kane ka nongrim ka wan sha kane ka party ban ïa trei lang na ka bynta ban dang kyntiew bad ban dang wan rah ïa shibun ki jingkylla hapoh ka jylla.
Shuh shuh, ka la ong ruh ba kane ka party kan dang ïaid shaphrang ban shakri sha ki paidbah bad kane ka party kan kham phai khmat kyrpang ruh ban kren ne ban leh ïa kiba bun ki jingduna hapoh ka jylla khnang ba kane ka jylla Meghalay bad wat ha ka thaiñ Shatei Lam Mihngi ka ri India kin dang kiew shaprang ha baroh ki liang khmatam ba kane ka party ruh ka dei ka party ba la tip ha ka ri India, ka la bynrap.