Nongpoh, Jymmang 28: Kum u nongmihkhmat paidbah ka Jirang Constituency, u Bah Sosthenes Sohtun u la ai khublei kyrpang ïa ki samla pule ka Constituency kiba la pas bha naduh ka SSLC examination bad ka HSSLC examination hadien ba ïa ki Result la pynbna da ka MBOSE.
Nalor baroh ki samla pule kiba la pass bha ha ka SSLC bad HSSLC examination, u Bah Sohtun u la ai khublei ïa baroh ki samla pule ba kin dang trei shitom ha ki jingpule bad khamtam u la phah ruh ka jingkhublei kaba kyrpang ïa u Samla Banpynshngaiñlang Thangkhiew uba la ioh rung ha ka top 20 jong ka HSSLC examination 2023 ha ka kyrdan kaba saw kaba long ka jingsarong bad ka burom ym tang ïa u shimet, ka ïing ka sem bad ka long ruh ka jingsarong ïa ka skul, ka Constituency, ka District bad ka jylla hi baroh kawei.
U Bah Sosthenes Sohtun kum u MLA ka Jirang Constituency, kum ka jingai mynsiem ïa ki samla pule u la phah ka khubor jingai khublei sha baorh kiba la pass bha ha ka SSLC bad HSSLC bad ha kajuh ka por u ai mynsiem ruh ïa ki ba kin dang minot ha ki jingpule ha kaba ha kane ka juk stad mynta ka jingnang jingstad ka long kaba kordor bad kaba kongsan ba kum ki samla pule ki hap shuwa ban ïa beh ban ioh lum ïa ka jingnang jingstad.
Shuh shuh, u kyntu ruh ïa ki samla pule bad kiwei kiwei ki samla pule ba ki dei ban don ïa kata ka thong bad ka jingrai ha ka jingim ban poi sha kata ka thong, namar kum ka Constituency bad ka District ka dang donkam shibun ki khun samla kiba la biang pura ha ka jingnang jingstad ban ïalam ïa ka imlang ka sahlang bad ruh ïa ka District bad ka jylla hi baroh na ka bynta ban wan rah ïa shibun ki jingkylla kiba ka imlang ka sahlang ka dang donkam.
